ریاست مہاراشٹر کے کابینہ وزیر برائے ٹیکسٹائل اسلم شیخ نے پاورلوم مالکان کو 27 سے کم ہارس پاور کے ساتھ اب آف لائن رجسٹریشن کرنے کا اختیار دیا ہے۔
ریاستی ٹیکسٹائل محکمہ کے ساتھ میٹنگ کے بعد اسلم شیخ نے کہا کہ کچھ دن قبل لوم مالکان کے وفد نے سہیادری گیسٹ ہاؤس میں منعقد اجلاس میں یہ مطالبہ کیا تھا کہ 27 سے کم ہارس پاور بجلی استعمال کرنے والے پاورلوم کو آف لائن رجسٹریشن کی سہولت فراہم کی جائے۔
انھوں نے کہا کہ ریاستی حکومت نے ان کے مطالبات تسلیم کرتے ہوئے پاورلوم مالکان کو بڑی راحت دی ہے، واضح رہے کہ بھیونڈی کے رکن اسمبلی رئیس شیخ، سابق رکن اسمبلی رشید طاہر مومن، مالیگاؤں کے سابق رکن اسمبلی آصف شیخ رشید، طارق فاروقی و پاورلوم اور ٹیکسٹائل صنعت کے لیڈران نے بھی مکتوب دیکر مطالبہ کیا تھا کہ 27 ہارس پاور سے کم بجلی صارف پاورلوم مالکان کو آف لائن اندراج کی سہولت فراہم کی جائے۔
اسلم شیخ نے کہا کہ آن لائن کنکشن کے عمل کی وجہ سے 27 سے کم ہارس پاور سپورٹ والے پاورلوم مالکان کو سرور ڈاؤن جیسے مسائل کا ہمیشہ سامنا کرنا پڑتا ہے، اس لیے اب آف لائن رجسٹریشن کے اختیارات کے ساتھ چھوٹے لوم مالکان اطمینان کا اظہار کریں گے۔
