ریاست مہاراشٹر کے ممبئی کے مسلم اکثریتی علاقے میں واقع جے جے اسپتال میں یونانی دواخانه موجود ہے لیکن حکومت نے اس دواخانہ کو منتقل کرنے کا فیصلہ کیا ہے۔
یونانی دواخانہ کو منتقل کیے جانے کی وجہ سے ممبئی کی عوام کو سستی دوائیاں اور طبی سہولتوں سے ہمیشہ کے لیے محروم ہونا پڑ سکتا ہے۔ عوام کی اس تکلیف کو دیکھتے ہوئے رکن اسمبلی ابو عاصم اعظمی یونانی دواخانہ کا جائزہ لینے کیے لیے جے جے اسپتال پہنچے۔
اس موقع پر ابو عاصم اعظمی نے کہا کہ اس علاقے میں متوسط طبقے سے تعلق رکھنے والے لوگ رہائش پذیر ہیں۔ طبی سہولتیں بنیادی ضرورتوں میں سے ایک ہے۔ متوسط طبقے کے لیے یہاں ہر وہ طبی سہولیات فراہم کی جاتی ہے جس کے لیے بہت ہی معمولی رقم درکار ہے۔ انھوں نے کہا کہ اب اگر اس دواخانے کو یہاں سے منتقل کیا گیا تو اس کا سب سے بڑا نقصان یہاں کی عوام کو ہی ہوگا۔
اعظمی نے کہا کہ اس تعلق سے ریاستی حکومت سے بات چیت کی جائے گی تاکہ اس دواخانہ کو یہاں سے منتقل نہ کیا جائے۔ واضح رہے کہ یونانی دواخانہ محکمہ آیوش کی زیر نگرانی میں یہاں گزشتہ 35برسوں سے اپنے فرائض اور خدمات انجام دے رہا ہے، چونکہ اطراف میں مسلم اکثریتی بستیاں آباد ہیں جو مہنگے اسپتال میں علاج کرنے سے قاصر ہیں۔
حکومت نے اس دواخانہ کو منتقل کرنے کا منصوبہ بنایا ہے لیکن جو لوگ یہاں مقیم ہیں ان کے بارے میں نہیں سوچا گیا۔
