ریاست مہاراشٹر کے ممبئی شہر میں واقع ملک کا سب سے عظیم تعلیمی ادارہ انجمن اسلام کے تعلیمی معیار کو دیکھ کر امریکہ کے نو منتخب صدر جوبائیڈن کی زوجہ جل بائیڈن بھی متاثر ہوگئی تھیں، اسی لیے سنہ 2013 میں جو بائیڈن اور ان کی زوجہ جل بائیڈن کے بھارتی دورے کے آخری مرحلوں کے دوران جل بائیڈن نے بھارت کے سب سے بڑے تعلیمی ادارے انجمن اسلام گرلس کالج میں طالبات سے خطاب کیا تھا۔
انہوں نے تعلیمی میدان میں نمایاں کردار ادا کرنے والے انجمن اسلام کی خدمات کو سراہا اور انجمن اسلام گرلس اسکول اور کالج کی طالبات سے خطاب کرتے ہوئے طالبات کو ملالہ یوسف زئی کی مثال دی اور تعلیم کو ترجیح دینے اور اسے ترجیح دینے پر زور دیا۔
انہوں نے طالبات کو دیکھ کر خوشی کا اظہار کرتے ہوئے کہا کہ تعلیم کے میدان میں آپ لوگوں نے اپنے آپ کو کسی سے پیچھے نہیں رکھا ہے یہی آپ کا مستقبل ہے اور اس تعلیم کی وجہ سے آپ کا مستقبل بہتر ہوگا، انجمن اسلام کے صدر ظہیر قاضی نے اس لمحے کو یاد کرتے ہوئے کہا کہ جل بائیڈن جب یہاں آئیں تو انہوں نے انجمن اسلام کے تعلیمی معیار کو دیکھا تو وہ اس کی خوب تعریف کی۔
ہمیں اس بات پر فخر ہے کہ علی گڑھ مسلم یونیورسٹی اور انجمن اسلام کی بنیادیں ایک ہی وقت میں تعمیر ہوئیں اور دونوں کے مقاصد قوم کو تعلیمی، معاشی ،ثقافتی طور پر بااختیار بنانا ہے، یہ ادارے گزشتہ 100 سالوں سے اپنے خوابوں کو پایۂ تکمیل تک پہنچانے میں سرگرمِ عمل ہیں۔
21 فروری سنہ 1874 کو ملک کے مغربی و تجارتی شہر ممبئی میں انڈین نیشنل کانگریس کے تیسرے صدر اور بمبئی ہائی کورٹ کے پہلے چیف جسٹس جناب بدرالدین طیب جی، سرمایہ دار جناب ناخدا محمد علی روگھے، جناب قمر الدین طیب جی، منشی غلام محمد اور ان کے رفقائے مخیر افراد کی نیک نیتی اور دانشمندی نے انجمن اسلام نامی تنظیم کی بنیاد ڈالی، ادارے کے قیام نے قوم کو تعلیمی و سماجی اور ادبی و ثقافتی سطح پر وہ مضبوط بنیاد فراہم کی جس نے آج کے مسابقتی دور میں پیشہ ورانہ اور عصری علوم کی راہیں استوار کیں۔
انجمن اسلام کے زیر اہتمام 97 سے زیادہ تعلیمی ادارے ہیں جن میں 3000 سے زائد اساتذہ کی کفالت میں ایک لاکھ سے زائد طالبعلم زیر تعلیم ہیں۔
