شیوسینا کے ممبر پارلیمان سنجے راوت کے اس بیان پر کہ وزیر اعلی کا عہدہ پانچ سال تک شیوسینا کے پاس رہے گا، اس بیان کے بعد سیاسی چہ مہ گوئی تیز ہو گئی ہے۔ ممبئی میں صحافیوں سے گفتگو کرتے ہوئے کانگریس کے ریاستی صدر نانا پٹو لے نے شیوسینا کے موقف کی حمایت کی ہے۔
واضح رہے کہ سنجے راوت نے کہا تھا کہ 'شیوسینا کے پاس 5 سال تک وزیر اعلی کا عہدہ رہے گا۔اس پر نانا پٹولے نے کہا کہ 'ہم سب اتفاق رائے سے سنجے راوت کے بیان کی حمایت کرتے ہیں۔ ادھو ٹھاکرے ہی پانچ سال تک وزیر اعلی رہیں گے اور انہیں کانگریس پارٹی کی حمایت حاصل ہوگی'۔ْ
انہوں نے کہا کہ 'اگر این سی پی وزیر اعلیی کا عہدہ کا دعویٰ کرے گی تو کانگریس پارٹی اپنا کردار ادا کرے گی۔نانا پٹو لے نے ایک طرح سے انتباہ بھی دیا ہے۔نانا پاٹولے نے مزید کہا کہ '2024 کے انتخابات میں کانگریس پارٹی ایک بڑی پارٹی بن کر ابھرے گی اور اگر عوام نے ہمیں زیادہ نشست دی، تو ہماری پارٹی بہتر فیصلہ کرے گی، کہ کس کو وزیر اعلیٰ بنایا جائے'۔
انہوں نے مزید کہا کہ 'ہم آئندہ کارپوریشن الیکشن اپنے طور پر لڑیں گے۔ انہوں نے یہ بھی کہا کہ ہمارے کارکنان اور عہدیداران کا بھی یہی مشورہ ہے۔انہوں نے این سی پی اور شیو سینا کے اتحاد کے تعلق سے کہا کہ 'لوگوں نے ان کے اتحاد کو دیکھ لیا ہے، جس کی مثال پنڈھر پوری میں ہوا ضمنی الیکشن ہے۔پنڈھر پور میں شیو سینا اور این سی پی نے ساتھ مل کر الیکشن لڑا اور اس کے بعد بھی انہیں جیت نہیں مل سکی۔ اس لئے اگر کانگریس پارٹی اپنے دم پر الیکشن لڑتی ہے تو اسے کوئی فرق نہیں پڑے گا۔
