ری پبلک ٹی وی کے سربراہ ارنب گوسوامی کے خلاف خودکشی کے لئے اکسان کے الزام میں درج شدہ ایف آئی آر کو منسوخ کرنے کے لئے بامبے ہائی کورٹ میں داخل شدہ عرضی پر سماعت آج دوپہر میں ہوگی۔
گزشتہ روز داخل کی گئی اس عرضی پر ابتدائی سماعت عمل میں آئی تھی جس دوران عدالت نے پولیس کو حکم دیا تھا کے وہ اس معاملے میں آج اپنا موقف پیش کرے۔
سنہ 2018 کے ایک کیس میں گزشتہ روز گرفتار کیے گئے ارنب گوسوامی کو مقامی عدالت نے 14 دن کے لئے عدالتی تحویل میں بھیجنے کا حکم دیا ہے۔
اپنی درخواست میں ارنب نے الزام عائد کیا ہے کہ پولیس نے اسے ایک ایسے معاملے میں غیر قانونی طور پر گرفتار کیا ہے جسے عدالت نے بند کر دیا تھا اور عدالت کی اجازت کے بغیر اسے دوبارہ کھولا گیا۔ نیز اس کے خلاف انتقامی کارروائی کے ارادے سے اسے گرفتار کیا گیا ہے۔
