ریاست مہاراشٹر کے معروف شہر مالیگاﺅں میں این سی پی کے 22 ویں یوم تاسیس کے موقع پر این سی پی کے دفتر پر ایک تقریب منعقد کی گئی۔ اس تقریب میں این سی پی کے مقامی صدر آصف شیخ کے ہاتھوں پرچم کشائی کی گئی۔ اس موقع پر شہر کی 22 بزرگ شخصیات کو تحائف بھی پیش کئے گئے۔ اس تعلق سے آصف شیخ نے کہا کہ 'شہر کے نوجوان نیشنلسٹ کانگریس پارٹی سے جڑ کر تعمیری کاموں کی انجام دہی کا بیڑا اٹھا رہے ہیں'۔
انہوں نے کہا کہ 'یہاں کا نوجوان یہ طے کرچکا ہے کہ شہر کی تعمیر و ترقی کے لیے وہ نیشنلسٹ کانگریس پارٹی کے ساتھ مل کر کام کرے گا، آصف شیخ نے یہ امید ظاہر کی کہ آئندہ کارپوریشن انتخابات میں این سی پی اپنی پوری طاقت کے ساتھ ہر سیٹ پر الیکشن لڑے گی اور کامیابی حاصل کرتے ہوئے کارپوریشن میں آئندہ میئر این سی پی ہی بٹھائے گی۔ جب کہ مستقبل کا رکن اسمبلی بھی این سی پی کا ہی ہوگا'۔
انہوں نے نوجوانوں کے جوش و خروش کو دیکھتے ہوئے کہا کہ 'اگر این سی پی نے دھولیہ مالیگاؤں لوک سبھا سیٹ پر الیکشن میں حصہ لیا تو ممبر آف پارلیمان بھی این سی پی کا ہی ہوگا۔ شیخ آصف نے کہا کہ 'کچھ لوگ سی اے اے اور این آر سی کے متعلق عوام کو گمراہ کررہے ہیں۔ جب تک مہاراشٹر میں این سی پی ہے تب تک سی اے اے اور این آر سی نافذ نہیں کیا جائے گا'۔
واضح رہے کہ این سی پی کے 22 ویں یوم تاسیس پر این سی پی دفتر پر 22 کلو گرام کا این سی پی نشان والا کیک کاٹ کر عوام میں تقسیم کیا گیا۔ اس پروگرام میں شکیل جانی بیگ، رفیق شیخ افضل، رفیق شیخ بشارت، دنیش ٹھاکرے، منان بیگ، فاروق قریشی، وغیرہ کے ساتھ ساتھ عوام کی کثیر تعداد موجود تھی۔
