ریا ست مہاراشٹر میں انتخابات سے قبل کانگریس اور این سی پی کے میونسپل کونسلرز، اراکین اسمبلی اور رہنماؤں نے ایک طرح سے بی جے پی اور شیوسینا میں شامل ہو کر جس طرح سے بھگوا سیاسی جماعتوں کو طاقت دی تھی اب وہی رہنما ریاست میں بی جے پی سینا حکومت کے قائم نہیں ہونے کے آثار سے کانگریس این سی پی میں دوبارہ واپس آ رہے ہیں۔
ساتھ ہی اب ان کی گھر واپسی کا سلسہ اس وقت آغاز عمل میں آیا جب ریاست کے پمپری چنچوڈ نامی میونسپل کارپوریشن کے 37 بی جے پی کے میونسپل کونسلرز نے راشٹروادی کانگریس پارٹی کے مقامی رکن اسمبلی سنیل شیڑکے کی قیادت میں کل بروز پیر راشٹروادی پارٹی میں شامل ہونے کا اعلان کیا ہے ۔
بی جے پی نے انتخابات سے قبل ان لیڈران کی اپنی پارٹی کی شمولیت کو 'میگا بھرتی' قرار دیا تھا لیکن اب یہ میگا بھرتی 'وی آر ایس 'کہی جانے لگی ہے یعنی کہ رضاکارانہ طور پر سبکدوش ہو کر اپنی پرانی پارٹیوں میں شامل ہو رہے ہیں۔
پمپری چنچوڈ کے یہ میونسپل کونسلرز کل ممبئی میں راشٹروادی کانگریس پارٹی کے سربراہ اجیت پوار کی موجودگی میں این سی پی میں شامل ہوں گے یہ اطلاع پارٹی کے ایک اعلی عہدیدار نے دی ہے۔
