ڈکیتوں نے اسلحہ سے دھمکاتے ہوئے اہل خانہ کو یرغمال بنالیا اور ان سے 60 لاکھ روپیے نقد، ایک کروڑ 26 لاکھ روپے کے طلائی زیورات سمیت ایک کروڑ 86 لاکھ روپے لوٹ کی واردات کو انجام دیتے ہوئے فرار ہوگئے۔
اس لوٹ کی واردات سے بڑے کاروباریوں اور مقامی باشندوں میں زبردست خوف وہراس ہے۔
واردات کی اطلاع موصول ہوتے ہی نارپولی پولیس اسٹیشن اور کرائم برانچ کی ٹیم فوراً جائے واردات پر پہنچ گئی۔ پولیس نے ڈاگ اسکوائڈ اور فنگر پرنٹ ایکسپرٹ کی ٹیم کو طلب کرتے ہوئے معاملہ درج کر فرار ملزمین کو سی سی ٹی وی فوٹیج کی بنیاد پر سرگرمی سے تلاش کرنا شروع کردیا ہے۔
اطلاعات کے مطابق شہر سے متصل کالہیر علاقے کے تاجر جگدیش پاٹل بھیونڈی تھانے شاہراہ پر واقع بی سی اپارٹمنٹ کی پہلی منزل پر اپنے اہل خانہ کے ساتھ رہائش پذیر ہیں۔
وہ روز کی طرح آج بھی صبح کی سیر پر گئے ہوئے تھے، ان کے جانے کے بعد گھر میں اہلیہ دو بچوں کے علاوہ معمر والدہ موجود تھیں۔
سیر سے جگدیش کے لوٹنے کے دوران وہ جیسے ہی گھر میں داخل ہوئے اسی دوران موقع پاتے ہی پہلے سے گھات لگائے مسلح ڈکیتوں نے دھاوا بول دیا اور گھر میں داخل ہوگئے اور جان سے مارنے کی دھمکی دیتے ہوئے پورے خاندان کو یرغمال بنا لیا۔
ڈکیتوں نے تقریباً 20 منٹ کے اندر الماری میں رکھے 60 لاکھ روپے نقدی اور تقریباً ایک کروڑ 26 لاکھ 30 ہزار مالیت کے سونے چاندی کے زیورات سمیت ایک کروڑ 86 لاکھ 30 ہزار روپے کا مال لوٹ کر چاروں ڈکیت کامیاب ہوگئے۔
اس واردات کی اطلاع موصول ہوتے ہی ڈپٹی پولیس کمشنر راج کمار شندے نارپولی پولیس اسٹیشن کے سینیئر پولیس انسپکٹر مالوجی شندے اپنے ساتھیوں کے ساتھ جائے واردات پہنچے اور باریک بینی سے معائنہ کیا۔
پولیس ٹیم عمارت اور اطراف کے سی سی ٹی وی فوٹیج کو کھنگال رہی ہے۔ اور معاملے کے ہر پہلو کی تفتیش کر رہی ہے۔
