مہاراشٹر: تبلیغی جماعت کے 28 اراکین عدالت سے باعزت بری

ممبرا پولیس تھانے میں ان سبھی کے خلاف مختلف دفعات کے تحت معاملے درج تھے ان میں سے 13 بنگلہ دیشی اور آٹھ ملیشیا کے شہری ہیں جبکہ چار بھارتی اور باقی تین غیر ملکی شہریوں کی مدد کرنے والے افراد ہیں۔

ریاست مہاراشٹر کے ضلع تھانے کی ایک مقامی عدالت نے دو مختلف معاملوں کا سامنا کررہے 21 غیرملکی شہریوں سمیت تبلیغ جماعت کے 28 افراد کو بری کردیا ہے۔

ان سبھی کے خلاف مختلف دفعات کے تحت ممبرا پولیس تھانے میں معاملے درج تھے۔ مجسٹریٹ آر ایچ جھا نے منگل کے روز اپنے فیصلے میں کہا کہ ہائی کورٹ پہلے ہی بتاچکی ہے کہ ملزموں کے خلاف کوئی بھی فوجداری معاملہ نہیں بنتا ہے اس لئے سبھی ملزمین بری ہونے کے حقدار ہیں۔ ہائی کورٹ کے فیصلے کے بعد اس سماعت کی اب کوئی بنیاد نہیں ہے۔تبلیغی جماعت کے وکیل اسماعیل شیخ نے اس دوران کہا کہ' جن افراد کو ضمانت ملی ہے ان میں سے 13 بنگلہ دیشی اور آٹھ ملیشیا کے شہری ہیں جبکہ چار بھارتی اور باقی تین غیر ملکی شہریوں کی مدد کرنے والے افراد ہیں'۔

ان سبھی کے خلاف 10 مارچ سے 31 مارچ کے درمیان تعزیرات ہند کی مختلف دفعات کے تحت مقدمات درج کیے گئے تھے۔