مرادآباد: ملبے سے کسان کو زندہ باہر نکالا گیا

مرادآباد میں ایک کسان بورویل سے پرانی اینٹ نکالتے وقت کنوے کی مٹی دھنسنے سے اس میں دب گیا، علاقے کے لوگوں نے آناً فاناً اسے باہر نکالا۔

ریاست اترپردیش کے ضلع مرادآباد میں کندرکی تھانہ کے تحت نگلا سالار گاؤں میں اس وقت افرا تفری کا ماحول پیدا ہوگیا جب ایک کسان اپنے کھیت پر بورویل سے اینٹ نکالتے وقت پاس کے کنوے کی مٹی دھنسنے سے اس میں دب گیا۔

لگ بھگ 30 فٹ گہرے کنوے میں کسان محمود (25) کے دب جانے کی خبر سن کر آس پاس کے کسان اکٹھا ہوگئے۔

پولیس کو فوراً اطلاع دی گئی اور خود وہاں جمع افراد نے مٹی کو ہٹانا شروع کیا۔ اطلاع ملنے پر پولیس اور انتظامیہ کے اعلی افسران موقع پر فائربریگیڈ کے ساتھ پہنچے اور جے سی بی کی مدد سے کھدائی شروع کردی۔

انتظامیہ کی مدد سے لوگوں نے راحت کا سانس لیا۔ لگ بھگ دو گھنٹے کی سخت مشقت کے بعد کسان کو بے ہوشی کی حالت میں باہر نکالا گیا۔

پولیس نے فوراً محمود کو علاج کے لیے اسپتال روانہ کیا۔ سی او مہندر شکلا نے بتایا کہ کسان کی حالت صحیح ہے پھر بھی اسے اسپتال بھیج دیا گیا ہے۔