ایس پی رہنما کے گھر پر قرقی کا نوٹس چسپاں

یوگی حکومت کی جانب سے اتر پردیش میں بدمعاشوں اور زمینی مافیاؤں کے خلاف مہم چلائی جا رہی ہے۔ اس مہم کے تحت بد معاشوں اور زمین مافیاؤں کی جائیداد کو ضبط کیا جارہا ہے۔

ریاست اتر پردیش کے ضلع مرادآباد میں سماج وادی پارٹی کے ایک مقامی رہنما اور اعظم خاں کے قریبی یوسف ملک کو زمین مافیا قرار دے کر ان کی کوٹھی پر قرقی کا نوٹس چسپاں کردیا گیا ہے۔

بتایا جا رہا ہے کہ یوسف ملک کے مکان پر قرقی کا نوٹس ضلع رامپور کے تھانہ عظیم نگر پولیس نے چسپاں کیے ہیں، رامپور کے تھانہ عظیم نگر میں یوسف ملک کے خلاف آئی پی سی کی مختلف دفعات کے تحت مقدمہ درج کیاہے۔

اس تعلق سے یوسف ملک فرار چل رہے ہیں۔ اگر وہ ایک ماہ کے اندر کورٹ میں حاضر نہیں ہوئے تو پولیس دفعہ 83 کے تحت قرقی کی کارروائی کرے گی۔