سہارنپور کے گلیرہ چوک کے رہنے والے پریم سنگھ کا الزام ہے کہ 'وہ اپنے اہل خانہ کے ساتھ اپنے گھر میں رہتا ہے لیکن اس کے پڑوسی اسے ہمیشہ پریشان کرتے رہتے ہیں۔'
پریم سنگھ کا مزید کہنا ہے کہ 'میرا پڑوسی بغیر لائسنس کے انجن والی چکی چلا رہا ہے جس پر حکومت نے آبادی کے درمیان میں اس چکی کو چلانے پر روک لگائی ہوئی ہے۔'
اس کا پڑوسی کئی مرتبہ اس کے ساتھ مارپیٹ بھی کرچکا ہے جس کی وجہ سے کچھ مقدمے اس نے اپنے پڑوسی رمیش پر کیے ہوئے ہیں لیکن رمیش اور اس کے کچھ ساتھی اسے ہمیشہ پریشان کرتے رہتے ہیں۔
پریم نے بتایا کہ گذشتہ 19 جون کو حملہ کا اندیشہ دیکھتے ہوئے اس نے 19 جون کو ایس ایس پی سہارنپور کو ایک تحریر بھی دی تھی اسی رات رمیش اور اس کے لڑکوں نے پریم سنگھ کے اوپر حملہ بھی کردیا جس کے بعد پولیس نے پریم سنگھ کے بڑے بیٹے سیٹ پال کو ہی جیل بھیج دیا۔
پریم سنگھ کا کہنا ہے کہ 'گذشتہ دنوں سہارنپور میں ہوئے صحافی اور اس کے بھائی کے قتل جیسی دھمکی رمیش اور اس کے لڑکے اسے دے رہے ہیں جس کی وجہ سے وہ اپنا مکان فروخت کرنے کا فیصلہ کر چکے ہیں۔'
اگر قصور واروں کے خلاف کار روائی نہیں کی گئی تو وہ اور اس کا خاندان ان غنڈہ عناصر کے خوف سے اپنا مکان فروخت کرکے ہجرت کرجائے گا۔
پریم سنگھ کا کہنا ہے کہ اس کے پاس اس کے اوپر ہوئے حملے کی سی سی ٹی وی فوٹیج بھی موجود ہیں لیکن وہ ویڈیو دیکھنے کے بعد بھی پولیس نے اسی کے بیٹے کو گرفتار کرکے جیل بھیج دیا ہے۔
اس سلسلے میں ایس پی سٹی ونت گھٹنا گر نے بتایا کہ یہ معاملہ ان کے علم میں ہے اور دونوں نے ہی ایک طرح کی چکی آمنے سامنے لگارکھی ہے جس کی وجہ سے دونوں میں اکثر جھگڑا ہوتا رہتا ہے دونوں فریقین کو بیٹھا کر بات کی جائے گی اور قصور وار کے خلاف قانونی کاروائی عمل میں لائی جائے گی۔
