ایم ٹی سی کمپیوٹر انسٹی ٹیوٹ کا سالانہ پروگرام اور تقسیم انعامات

ریاست اترپردیش کے شہر رامپور میں واقع ایم ٹی سی کمپیوٹر سینٹر نے آج اپنے سالانہ جلسہ کا اہتمام کیا جہاں طلبا و طالبات نے ثقافتی پروگرام پیش کر کے اپنی صلاحیتوں کا مظاہرہ کیا۔ اس موقع پر کامیاب طلبا و طالبات کو انعامات سے بھی نوازا گیا۔

تکنیک کے اس جدید دور میں درسی کتب کے ساتھ ساتھ کمپیوٹر سے واقفیت بھی وقت کی ایک اہم ضروریات میں سے ہے۔ اس ضرورت کی تکمیل کے لیے رامپور میں گزشتہ کئی برسوں سے ایم ٹی سی کمپیوٹر انسٹی ٹیوٹ طلبا و طالبات کو کمپیوٹر کی بنیادی تعلیمات سے آراستہ کرنے میں سرگرم عمل نظر آ رہا ہے۔ آج اس ادارے کی جانب سے سالانہ تقریب کا اہتمام کیا گیا۔ جہاں ادارے سے وابستہ طلبا و طالبات نے ثقافتی پروگرام پیش کرکے اپنے فن کے جوہر دکھائے۔ ساتھ ہی نوجوانوں نے اپنے ان پروگراموں کے ذریعہ سماج کی بیداری کا بھی پیغام دیا۔ ایم ٹی سی کی جانب سے اس سالانہ تقریب کا اہتمام اس کے یوم تاسیس کے موقع پر کیا جاتا ہے۔

مہمان خصوصی کے طور پر شرم آیکت نرمتا سنگھ نے شرکت کی۔ جن کے اعزاز میں رئیس رامپوری کلیان سنستھان کی جانب سے نشا خان نے روہیلکھنڈ اردو۔ہندی لغت پیش کی۔ اس موقع پر طلبا کے ساتھ ہی بڑی تعداد میں شہر کی معزز شخصیات نے شرکت کر کے طلبا کی حوصلہ افزائی کی۔ کمپیوٹر کے میدان میں بہترین کارکردگی پیش کرنے والے طلبا کو اعزازات سے بھی نوازا گیا۔ جہاں کامران خان کو اسٹوڈنٹ آف دی ایئر کا ایوارڈ دیا گیا۔ جدید ٹکنالوجی کی تعلیم کے ساتھ ساتھ ایم ٹی سی انسٹیٹیوٹ نوجوانوں کو ملک و ملت کی تہذیب و ثقافت سے روشناس کرانے کے مواقع بھی فراہم کرتا ہے۔ آج کی یہ سالانہ تقریب بھی اس کی عکاسی کرتی نظر آئی۔