حکومت ہند اور صوبائی حکومت کی ہدایت پر ہاکی کے جادوگر میجر دھیان چند کے یوم پیدائش کے موقع پر 'فٹ انڈیا موومنٹ' کے سلسلے میں رامپور کے مختلف اداروں میں پروگرام منعقد ہوئے۔
خصوصی پروگرام گورنمنٹ رضا پی جی کالج کے سیمینار ہال میں ہوا جہاں پرنسپل، پروفیسر اور دیگر کالج اسٹاف کے علاوہ بڑی تعداد میں طلبا و طالبات نے شرکت کی۔
اس موقع پر پروجیکٹر کی مدد سے اندرا گاندھی اسٹیڈیم دہلی میں منعقدہ 'فٹ انڈیا موومنٹ' کے افتتاحی پروگرام میں وزیراعظم کے تقریر کی اسکریننگ بھی کرائی گئی۔
وزیر اعظم کی تقریر سماعت کرنے کے بعد طلبا و طالبات کافی پرجوش نظر آئے اور انہوں نے اپنی زندگی میں ملک و قوم کے تئیں ہمدردی کا جزبہ رکھنے اور صحت و تندرستی کے لیے بیدار رہنے کا عہد لیا۔
وہیں پرنسپل ڈاکٹر پی کے وارشنئے نے کہا کہ وہ جلد ہی کالج میں اس تعلق سے سرگرمیوں کا آغاز کرنے جا رہے ہیں۔
انہوں نے مزید کہا کہ کالج کی جانب سے صحت سے متعلق درس و تدریس کا ایک پروگرام بھی شروع کیا جائے گا۔
