اترپردیش اسمبلی انتخابات 2022 کی ابھی تاریخوں کا اعلان نہیں ہوا ہے لیکن ریاست میں سیاسی سرگرمیاں تیز ہوتی جا رہی ہیں۔ آج رامپور کے مسلم اکثریتی علاقہ میں بی جے پی اقلیتی مورچہ کی جانب سے انتخابی جلسہ کا انعقاد کیا گیا، جہاں بی جے پی اقلیتی مورچہ کے ریاستی صدر کنور باسط علی نے مہمان خصوصی کے طور پر شرکت کی۔
کنور باسط علی نے عوام سے خطاب کرتے ہوئے کہا کہ بی جے پی حکومت میں اترپردیش میں نہ کوئی فساد ہوا اور نہ ہی کہیں کسی پر ظلم و زیادتی دیکھنے کو ملی۔ انہوں نے کہا کہ یوگی حکومت میں سب کا ساتھ، سب کا وکاس اور سب کا وشواس کے تحت کئی ترقیاتی کام ہوئے ہیں۔
بی جے پی اقلیتی مورچہ کے ریاستی صدر کنور باسط علی نے ہندو مذہب اختیار کرنے والے اترپردیش شیعہ وقف کے سابق چیئرمین وسیم رضوی کو اپنی سخت تنقیدوں Strong Criticism on Wasim Rizvi کا نشانہ بناتے ہوئے کہا کہ بدعنوانیوں کو انجام دینے والے وسیم رضوی جیسے لوگوں کو رامپور کے رکن پارلیمان اعظم خاں لائے تھے جبکہ اس پر کارروائی کے لئے مقدمات یوگی حکومت میں عائد ہوئے ہیں اور جلد ہی اس کو اس کی غلط کرتوتوں کی سزا بھی ملے گی۔
یہ بھی پڑھیں:
Student Opinion on UP Election 2022: یوپی اسمبلی انتخابات پر لکھنؤ یونیورسٹی کے طلبا و طالبات کی رائے
بی جے پی اقلیتی مورچہ کی جانب سے مسلم اکثریتی علاقہ میں ہونے والے اس جلسہ میں کافی کم تعداد میں لوگ پہنچے۔ زیادہ تر کرسیاں خالی ہی رہیں، جس پر ریاستی صدر نے بھی منتظمین پر اپنی ناراضگی کا اظہار کیا۔ پروگرام کے منتظم اور اقلیتی مورچہ کے ضلع صدر وسیم خان نے اپنی صفائی پیش کرتے ہوئے کہا کہ شادیوں کا موسم ہے، لوگ شادیوں میں ملوث ہیں اسی لئے لوگ کم پہنچے۔
