نوئیڈا میں فیشن، فوڈ اور ثقافت کو فروغ دینے کے لیے سی ڈی فاؤنڈیشن کے اقدام پر افغان سفارتخانے کے ساتھ 15 روزہ گرینڈ نمائش میلہ کا آغاز کیا گیا۔
اس موقع پر اسلامی جمہوریہ افغانستان کے سفیر طاہر قادری نے شرکت کی۔ اس دوران فیشن شو بھی پیش کیا گیا۔
افغانستان کے سفیر طاہر قادری نے کہا کہ 23 ستمبر کو افغانستان کی آزادی کے سو سال مکمل ہوچکے ہیں۔
انہوں نے کہا کہ صد سالہ تقریبات کے موقع پر سی ڈی فاؤنڈیشن کے اشتراک سے بھارت اور افغانستان میں فیشن، فوڈ اور ثقافت کو فروغ دینے کے لیے 10 سے 25 اکتوبر تک دہلی این سی آر اور چندی گڑھ کے مختلف مقامات پر 15 روزہ نمائش کا انعقاد کررہے ہیں۔
سفیر طاہر قادری نے کہا کہ بھارت اور افغانستان کی ثقافت میں بہت مماثلت ہے۔ اس کے ساتھ ہی انہوں نے بتایا کہ مجھے انڈین پانی پوری بہت پسند ہے اور ہم وقتا فوقتا اپنی پسندیدہ ڈشوں کو اپنے کھانے میں رکھتے ہیں۔
سی ڈی فاؤنڈیشن کی بانی ڈائریکٹر چارو داس نے کہا کہ ہمارے لیے یہ اعزاز کی بات ہے کہ ہماری تنظیم کو یہ ذمہ داری سونپی گئی ہے کہ وہ افغان فیشن ، فوڈ اور ثقافت کو فروغ دے۔
اس موقع پر اے اے ایف ٹی کے چیئرمین سندیپ ماروا نے کہا ، "ہم سی ڈی فاؤنڈیشن کی بانی ڈائریکٹر اور افغانستان کے سفیر طاہر قادری کو ایسے پروگرام منعقد کرنے پر مبارکباد پیش کرتے ہیں۔
اس موقع پر وشال ، سونی ، رامین اعتکزادہ ، اور افغانی وفد (فوڈ ، فیشن اور ثقافت کے) بھی موجود تھے۔
