میرٹھ: 'ایک بار پھر سے مکمل لاک ڈاؤن نافذ کیا جائے'

ضلع میرٹھ میں مسلسل کورونا وائرس متاثرین اور اموات کی تعداد میں اضافے کے سبب شہر کے دانشوران نے حکومت سے دوبارہ لاک ڈاؤن کا مطالبہ کیا ہے

ان لاک ون میں دی گئی رعایت مغربی اُترپردیش کے لیے پریشانی کا سبب بنتی جا رہی ہے، 70دنوں کے لاک ڈاؤن میں صرف میرٹھ میں 435 پوزیٹو معاملے سامنے آئے تھے اور 30 مریضوں کی موت ہوئی تھی۔ وہیں اب محض 18 دنوں میں کورونا پوزیٹو مریضوں کی تعداد 735 پہنچ گئی اور 28 مریضوں کی موت ہو گئی۔

سماجی سرکردہ افراد و کاروباریوں کا ماننا ہے کہ ان لاک ون میں دی گئی رعایت اور لوگوں کی لاپرواہی اب تمام احتیاطی اقدامات پر بھاری پڑ رہی ہے اور گزرتے وقت کے ساتھ کورونا انفیکشن کا خطرہ کم ہونے کے بجائے تیزی سے بڑھتا جا رہا ہے۔

شہر کے دانشور طبقے کا کہنا ہے کہ تیزی سے بڑھتے مریضوں کی تعداد اور اموات کے سلسلے کو روکنے کے لیے ایک بار پھر مکمّل لاک ڈاؤن کا نافذ کیا جانا ضروری ہے ورنہ آنے والے دنوں میں حالات اور بے قابو ہو سکتے ہیں۔