میرٹھ: افغانستان میں رہ رہے سکھوں کے لیے حکومت سے مدد کی اپیل

گردوارہ سنگھ سبھا کے صدر رنجیت سنگھ نندا نے کہا کہ افغانستان سے امریکی فوجیوں کی واپسی کی شروعات کے بعد سے ہی طالبان کی پیش قدمی کا سلسلہ جاری ہے جو ملک کے عوام خاص کر اقلیت کے لیے ایک بڑا خطرہ ثابت ہو رہی ہے۔ ملک کے کئی حصوں میں قابض ہونے کے ساتھ ہی طالبان نے عام لوگوں پر ظلم ڈھانا شروع کر دیا ہے۔

رنجیت سنگھ نندا نے بتایا کہ افغانستان میں سکھوں کے مذہبی مقامات پر طالبان کی جانب سے قبضہ جمانے کے بعد اب اقلیتی آبادی کی زندگیوں کو بھی خطرہ لاحق ہے۔

انہوں نے کہا کہ افغانستان کے صوبہ پکتیا کے چمکانی میں واقع گرودوارہ نشان صاحب کی چھت سے سکھ جھنڈے کو ہٹانے کے بعد دنیا بھر کے سکھو میں طالبان کے خلاف ناراضگی کے ساتھ افغانستان میں رہنے والے سکھوں کی زندگی بچانے کے لیے بھی فکرمند ہیں۔

اترپردیش کے ضلع میرٹھ کے سکھ طبقے کے لوگوں نے بھارت اور کناڈا حکومت سے ان سکھوں کو افغانستان سے باہر نکالنے کی اپیل کی ہے۔

آج میرٹھ میں سکھ گرودوارہ پربندھک کمیٹی اور سنگھ سبھا نے یو این او اور بھارتی حکومت سے اس معاملے میں مداخلت اور کارروائی کی مانگ کی ہے۔

افغانستان میں رہنے والے سکھوں کی حفاظت کے لیے سکھ تنظیموں کی جانب سے بھارتی حکومت سے اپیل کی جا رہی ہے کہ افغانستان میں طالبان کے بڑھتے ظلم اور اقلیتی آبادی کی زندگی پر بڑھ رہے خطرے سے بچانے کے لئے بھارتی حکومت کو اقدامات اٹھانے ہوں گے۔