کورونا وبا کا قہر ابھی کم نہیں ہوا تھا کہ ملک کے شمالی علاقوں میں ٹڈیوں کا خطرہ منڈرانے لگا ہے۔ راجستھان، گجرات، مدھیہ پردیش کے بعد یو پی میں بھی فصلوں اور پیڑ پودوں پر ٹڈیوں کے حملے کا خطرہ پیدا ہو گیا ہے۔
مغربی یو پی میں جہاں کاشتکار ٹڈیوں کے حملے کے خطرے سے پریشان ہیں وہیں میرٹھ میں الرٹ نہ ہونے کے باوجود ضلع انتظامیہ نے اپنی سطح پر ٹڈیوں سے نمٹنے کی تیاری شروع کر دی ہے۔ اس دوران ضلع انتظامیہ کے ذریعہ پورے ضلع میں تقریباً پانچ سو ٹینکروں کا انتظام کرکے دواؤں کے چھڑکاؤ کا کام شروع کیا جا رہا ہے۔
میرٹھ کے ڈی ایم انیل ڈھنگرا نے بتایا کہ ٹڈی دل سے نمٹنے کے لئے ضلع انتظامیہ نے ایک جائزہ میٹنگ کی ہے جس مین کئی فیصلے لئے گئے ہیں۔ انہوں نے کہا کہ متعلقہ تمام لوگوں کو ہدایت دے گئی ہے۔ زراعتی افسران و ملازمین کے ساتھ ساتھ کسانوں سے بھی رابطہ کیا گیا ہے اور علاقے میں دواؤں کے چھڑکاؤ کا کام جلد ہی شروع کر دیا جائے گا۔
