ملک کی موجودہ صورت حال کو دیکھتے ہوئے مغربی اترپردیش کے ضلع میرٹھ کے شاہی جامع مسجد کے امام قاضی زین الساجدین نے امت سے گزارش کی ہے کہ عید الاضحی کے موقع پر قربانی کے جانوروں کو احتیاط کے ساتھ لائیں۔
انہوں نے مزید کہا ہے کہ میرٹ کے حالات درست نہیں ہیں جس کی وجہ سے حالات کا تقاضہ ہے کہ ہم اپنی طرف سے حتی الامکان یہ کوشش کریں کہ قربانی کے جانوروں کو مسلم آبادی سے لایا جائے جس کی وجہ سے شر پسند عناصر کو ماحول خراب کرنے کا کوئی موقع نہیں ملے گا، موجودہ صورت حال کو دیکھتے ہوئے ہمیں جانوروں کے ساتھ ساتھ مذبح خانہ کو بھی چاروں طرف سے گھیراو کرنا ہوگا۔
واضح رہے کہ آئندہ ماہ 11 یا 12 اگست کو عید الاضحی کا تہوار ہے جس میں مسلم امت اپنے جد امجد ابراہیم علیہ السلام کی سنت کا اعادہ کرتے ہیں۔ اس تہوار کے سلسلے میں مسلم آبادی کو کافی عقل مندی اور دور اندیشی کا مظاہرہ کرنے کی ضرورت ہے۔
واضح رہے کہ 30 جون کو میرٹھ کے فیض عام انٹر کالج میں ریاست جھارکھنڈ میں ہونے والے ماب لنچنگ کے خلاف احتجاجی مظاہرہ کررہے لوگوں کی گھر واپسی کے دوران پولیس نے لاٹھی چارج کیا اور سنگین دفعات کے تحت 49 لوگوں کو گرفتار کر جیل بھیج دیا تھا.
