ریاست اُتر پردیش کے بڑے صنعتی شہر میرٹھ کی پہچان سمجھی جانے والی اسپورٹس صنعت بھی باقی صنعتوں کی طرح لاک ڈاؤن کے سبب برے دور سے گزر رہی ہے۔
پوری ریاست کی طرح ضلع میرٹھ میں بھی گزشتہ دو ماہ سے کاروبار بند ہونے سے اس صنعت کو کافی نقصان پہنچا ہے اور آنے والے وقت میں بھی حالات بہتر ہوتے نظر نہیں آرہے ہیں۔
لاک ڈاؤن 4.0 کے ختم ہونے کے بعد اب کچھ رعایت ملنے کے باوجود اسپورٹس صنعت کو نئے چیلنج کا سامنا کرنا پڑ رہا ہے۔
لاک ڈاؤن کے دوران بند کاروباری سرگرمیوں سے اسپورٹس انڈسٹری کو کروڑوں کا نقصان اٹھانے کے ساتھ ہی اب فیکٹری مالکان کے علاوہ انڈسٹری سے وابستہ کامگار طبقہ بھی بے روزگار ہو گیا ہے۔
ضرورت ہے کہ اس صنعت كو بچانے میں حکومت كو بھی مثبت کردار نبھانا ہوگا تاکہ یہ صنعت پھر سے پٹری پر لوٹ آئے۔
عالمی وبا کورونا وائرس کے قہر سے پیدا ہوئے خطرات اور خوف نے لاک ڈاؤن کے دوران نہ صرف عام زندگی کو بری طرح متاثر کیا ہے بلکہ کارخانے فیکٹریاں اور کاروبار بند ہونے سے اقتصادی سرگرمیوں اور ترقی کے سلسلے کو بھی روک دیا ہے۔
