نتائج کے بعد غیر معمولی صلاحیت رکھنے والے طلبہ میں مایوسی

کورونا کے پیش نظر ہائی سیکنڈری اور سینئر سیکنڈری بورڈ امتحانات منعقد نہیں کئے گئے اور نتائج کے لیے مارکنگ سسٹم اپنایا گیا۔ لیکن مارکنگ سسٹم نے غیر معمولی صلاحیت رکھنے والے طالب علموں کو مایوس کردیا۔ بورڈ میں امتحانات کے نتائج سے ناراض طلبہ دوبارہ امتحانات کروانے کا مطالبہ کر رہے ہیں۔

اتر پردیش کے ضلع میرٹھ میں سی بی ایس ای اور آی سی ایس سی بورڈ کے نتائج کے اعلان کے بعد گزشتہ روز یو پی بورڈ کے ہائی سیکنڈری اور سینئر سیکنڈری کے نتائج کا اعلان کیا گیا ۔

بورڈ کے گزشتہ جماعت کے نمبروں کی بنیاد پر اوریج مارکنگ سسٹم سے جہاں ایوریج طالب علموں میں خوشی نظر آئی وہیں غیر معمولی تعلیمی صلاحیت والے ٹاپر طالب علموں میں نمبروں کو لیکر مایوسی ہے۔

پچھلی جماعتوں میں اعلی نمبر حاصل کرنے والے بچے ایوریج مارکنگ میں کم پرسنٹیج آنے سے مایوس اور ناخوش ہیں۔

تعلیم کے شعبہ سے وابستہ ماہرین کا بھی کہنا ہے کہ ایوریج مارکنگ کے ذریعے نتائج کا اعلان طالب علموں کو آگلی جماعت کے لیے پروموٹ کر دینے کی محض رسم ادائیگی ہے۔

کورونا وبا کے پیش نظر اس مسئلہ کا مستقل حل نکالنا بھی ضروری ہے تاکہ تعلیم میں بہتر کرنے والوں کے ساتھ انصاف کیا جا سکے ۔
کورونا وبا کے قہر کے سبب گزشتہ دو تعلیمی سیشن اور بورڈ امتحانات متاثر ہوئے ہیں۔

تاہم ضروری ہے کہ امتحانات کے نتائج کے لیے ایوریج مارکنگ سسٹم کے بجائے ایسا طریقہ اختیار کیا جائے تاکہ طالب علموں کی تعلیم اور محنت رائیگاں نہ جائے۔