اسدالدین اویسی ملک کی تہذیب سے واقف نہیں: کابینہ وزیر ستیش مہانا

متھرا میں کاروباریوں کے ایک پروگرام سے خطاب کرتے ہوئے کابینہ وزیر ستیش مہانا نے کہا کہ 'ایم آئی ایم سربراہ اسد الدین اویسی ملک کی تہذیب سے واقف نہیں ہیں۔'

اتر پردیش کے شہر متھرا میں منعقد ایک تقریب میں شرکت کرنے پہنچے کابینہ وزیر ستیش مہانا نے کہا کہ ایم آئی ایم کے صدر اسد الدین اویسی ملک کی تہذیب و ثقافت سے واقف نہیں ہیں۔ اس کے علاوہ انہوں نے کسان رہنما راکیش ٹکیت پر الزام عائد کیا کہ وہ اپوزیشن سے ملے ہوئے ہیں۔

ایک سوال کے جواب میں انہوں نے کہا کہ اسد الدین اویسی کی جانب سے جس طرح کے بیانات دیے جارہے ہیں اس سے سماج میں تفرقہ پیدا ہوتا ہے۔ انہوں نے کہا کہ اسد الدین اویسی ملک کی تہذیب و ثقافت سے واقف نہیں ہیں۔ انہوں نے مزید کہا کہ اسد الدین اویسی کے جتنے حامی ہیں، آگے چل کر ان کی تعداد کم ہوجائے گی۔

وہیں دوسری طرف راکیش ٹیکیت پر بات کرتے ہوئے انہوں نے کہا کہ وہ اللہ اکبر کا نعرہ لگاتے ہیں اور یہ نعرہ تمام اپوزیشن جماعتوں کا ہے۔

تقریب کے بعد میڈیا کے نمائندوں سے بات کرتے ہوئے انہوں نے کہا کہ بد قسمتی سے ایک ضلع کے ایک گاؤں کے اندر ڈینگو کے زیادہ کیس سامنے آئے ہیں۔

انہوں نے ضلع انتظامیہ کے اعلی افسران کے ساتھ ایک میٹنگ کی۔ انہوں نے ہدایت دی کہ ہر حال میں اینٹی لاروا کا چھڑکاؤ کریں۔

انہوں نے مزید کہا کہ صاف صفائی کے لیے مختلف ٹیمیں تشکیل دی جائیں اور یہ ٹیمیں مختلف علاقوں میں صفائی ستھرائی کو یقینی بنائیں تاکہ مذکورہ بیماری سے نجات مل سکے۔

ایک سوال کے جواب میں انہوں نے کہا کہ اچانک ایک ساتھ کئی بچے بیمار ہوگئے ہیں جس کی وجہ سے ایک بیڈ پر 2 بچوں کو رکھنا پڑ رہا ہے۔ انہوں نے کہا کہ بیڈ کا معقول انتظام نہیں تھا اور ایسی حالت میں علاج کے لیے آ رہے بیمار بچوں کو اسپتال سے واپس نہیں بھیج سکتے۔

انہوں نے کہا بیڈ کی تعداد میں خاطر خواہ اضافہ کے لیے وہ سرگرم ہیں۔

واضح رہے کہ ایم آئی ایم کے صدر اسدالدین اویسی نے اتر پردیش کے سلطان پور میں کہا تھا کہ آر ایس ایس کے سربراہ موہن بھاگوت تاریخ سے نابلد ہیں۔

انہوں نے کہا کہ اسلام تلوار اور بادشاہوں کے وجہ سے نہیں بلکہ صوفیوں کی تعلیمات سے پھیلا ہے۔