اتر پردیش اردو اکادمی اردو زبان کے فروغ کے لیے متعدد اسکیمیں چلاتی ہے۔ اکادمی شعراء، ادبا، مصنفین اور صحافیوں کی مالی امداد، طلبا کے لیے وظیفہ، ساتھ ہی ہر سال اردو زبان کی خدمات سرانجام دینے والے لوگوں کو آوارڈ بھی دیتی ہے لیکن چیئرمین نہ ہونے کی بنیاد پر کام متاثر ہو رہے ہیں۔
اردو اکادمی کے ممبر ڈاکٹر شاداب عالم نے ای ٹی وی بھارت سے بات چیت کے دوران بتایا کہ چیئرمین کی تقرری نہ ہونے کی وجہ سے اردو اکادمی میں گزشتہ دو برس سے آوارڈ کا اعلان نہیں ہو رہا ہے کیونکہ بغیر چئیرمین کے اکادمی کے ممبران ایوارڈ کا اعلان نہیں کر سکتے۔
ڈاکٹر شاداب نے بتایا کہ اردو اکادمی اردو زبان کے فروغ کے لیے سیمینار منعقد کرتا ہے لیکن چیئرمین نہ ہونے کی وجہ سے یہ اہم کام بھی سب سے زیادہ متاثر ہوا ہے۔ اس کے علاوہ اردو اکادمی کے اشتراک سے اتر پردیش کے تقریبا سبھی اضلاع میں مختلف عنوانات پر سمینار منعقد ہوتے تھے۔ اس کے لئے اکادمی مالی امداد بھی کرتی تھی۔ بڑی رقم کے لئے چیئرمین کی منظوری ضروری ہوتی تھی۔
لاک ڈاؤن کے سبب مشاعرہ، ادبی محفل، سمینار پر پابندی عائد ہے، جس سے بہت سارے شاعر، ادیب اور مصنف پریشان ہیں کیونکہ لاک ڈاؤن کے پہلے اسی کے ذریعے ان کی آمدنی ہو جایا کرتی ہے لیکن اب حالات مزید خراب ہیں۔ شاداب عالم نے کہا کہ چئیرمین نہ ہونے سے ہم 60 سال کے اندر کے شعراء اور دوسرے لوگوں کی مالی امداد نہیں کر سکتے کیونکہ بغیر چئیرمین کے ایسا ممکن نہیں۔
اردو اکادمی کی کچھ اسکیم ابھی بھی پہلے کی طرح جاری ہیں، جن میں شعراء، ادیب، مصنف اور صحافیوں کی مالی امداد ہے۔ انہوں نے بتایا کہ اس کے لیے کچھ شرائط بھی ہیں، جنہیں پورا کرنا ضروری ہے۔
مسٹر شاداب نے بتایا کہ اکادمی ان شعراء، ادیب، مصنف اور صحافیوں کی مالی امداد کرتی ہے، جن کی عمر 60 سال یا اس سے زیادہ ہو اور ان کی مالی حالت بہتر نہ ہو۔ اس کے لئے اکادمی میں فارم بھرنا ہوتا ہے۔ اکادمی کے ذمہ داران فارم کی جانچ پڑتال کرنے کے بعد ماہانہ پینشن جاری کرتی ہے۔
اردو اکیڈمی کے ممبر نے بتایا کہ اکادمی اردو زبان کے صحافیوں کے لیے اک مشت مالی امداد کے تحت مدد کرتی ہے۔ انہوں نے بتایا کہ اس اسکیم میں عمر کی کوئی بندش نہیں ہے۔اگر کوئی صحافی لمبے عرصے سے بیمار ہے یا اسے ایسی بیماری ہو گئی ہے، جس کے علاج میں زیادہ پیسوں کی ضرورت ہوتی ہے۔ ان کے لیے اردو اکادمی 20 ہزار روپے سے لیکر کر 50 ہزار روپے تک کں مالی امداد کرتی ہے۔
قابل ذکر ہے کہ گذشتہ سال اردو اکادمی کی چئیرمین آصفہ زمانی کے ریٹائر ہونے کے ساتھ ہی ابھی تک اکادمی کو کوئی نیا چیئرمین نہیں ملا۔ جس وجہ سے گزشتہ دو سالوں سے اکادمی کی جانب سے ملنے والے آوارڈ کا اعلان بھی نہیں ہو پا رہا ہے، ساتھ ہی شعراء اور دوسرے ادبی لوگوں کی مالی امداد بھی نہیں ہو پا رہی ہے۔
