ریاست اترپردیش کے بارہ بنکی میں لکھنؤ ایم ایل سی گریجویٹ اور ٹیچرس نشست کے لئے ووٹنگ جاری ہے۔
ضلع کے 49 مراکز پر کووڈ 19 کے سبب سماجی فاصلے اور تمام گائیڈلائن پر مکمل طور سے عمل کے ساتھ پر امن ووٹنگ کا عمل جاری ہے۔ رائے دہندگان میں اس دوران ووٹنگ کے لئے خاصا جوش نظر آ رہا ہے۔
واضح ہو کہ لکھنؤ ایم ایل سی گریجویٹ نشست پر 24 امیدوار اور ٹیچرس نشست پر 11 امیدواروں کی قسمت منگل کو ووٹنگ باکس میں قید ہو جائے گی۔ بارہ بنکی کے تمام پولنگ مراکز پر منگل صبح 7 بجے سے کووڈ 19 کی گائیڈلائین پر مکمل عمل کے ساتھ ووٹنگ کرائی جا رہی ہے۔ پولنگ مراکز پر رائے دہندگان کو ماسک کے ساتھ ہی داخلہ دیا جا رہا ہے، ماسک نہ ہونے کی صورتحال میں انہیں پولنگ مراکز پر ماسک دستیاب بھی کرایا جا رہا ہے۔ اس کے بعد تمام رائے دہندگان کے ہاتھ سینیٹائز کرائے جا رہے ہیں اور ووٹنگ ہال میں سماجی فاصلے کے ساتھ داخلہ دیا جا رہا ہے۔ تمام پولنگ مراکز پر حفاظت کے پختہ انتظامات کئے گئے ہیں، کسی بھی مراکز سے کسی گڑبڑی کی خبر نہیں ہے۔
