ریاست اترپردیش میں کورونا کے معاملات میں مسلسل اضافے کی وجہ سے ریاستی حکومت انفیکشن سے بچانے کے لیے کورونا کے بارے میں مسلسل رہنما اصول جاری کررہی ہے لیکن بی جے پی کے رہنما ہی مرکزی اور ریاستی حکومت کے رہنما خطوط پر عمل پیرا نہیں ہیں۔
ایسا ہی ایک معاملہ اس وقت پیش آیا جب جالون کے کوچ نگر میں بی جے پی کے رکن پارلیمنٹ بھانو پرتاپ ورما نے اپنے بیٹے کی شادی کے موقع پر سماجی فاصلہ کو برقرار نہیں رکھا۔
بی جے پی کے رکن پارلیمنٹ بھانو پرتاپ ورما سے جب اس تعلق سے پوچھا گیا تو انہوں نے کہا کہ تصویر اس طرح سے لی گئی ہے کہ اس میں سماجی فاصلہ نظر نہیں آرہا ہے، جبکہ پروگرام کے دوران سماجی فاصلے کا خیال رکھا گیا تھا لیکن تقریب کے دوران ہی ماسک ہٹا دیا گیا تھا اور انھوں نے مزید کہا کہ عوامی نمائندوں کی شادی میں اتنا ہجوم تو ہو ہی جاتا ہے۔
واضح رہے کہ کورونا بحران میں نائب ضلع مجسٹریٹ نے شادی تقریب میں صرف 5 افراد کے شرکت کی اجازت دی تھی لیکن رکن پارلیمنٹ نے سیکڑوں افراد کو شادی کی دعوت دی اور وہ بھی شادی میں بغیر کسی ماسک کے تھے۔
وہیں مرکزی حکومت نے ہدایت نامہ جاری کیا تھا کہ شادی میں دلہا اور دلہن کے ساتھ 30 افراد شامل ہوسکتے ہیں لیکن جالون میں بی جے پی کے رکن پارلیمنٹ بھانو پرتاپ ورما نے اپنے بیٹے کی شادی میں مرکزی حکومت کی ہدایت نامہ کی صاف طور سے خلاف ورزی کی۔
بی جے پی کے رکن پارلیمنٹ نے اپنے بیٹے کی شادی کوچ نگر سے کی جہاں ضلع میں کورونا کے سب سے زیادہ مریض ہے اور یہ علاقہ اس وقت ضلع کا ہاٹ اسپاٹ کی فہرست میں ہے جس کی وجہ سے 12 جون کو کوچ نگر کے ڈپٹی ڈسٹرکٹ آفیسر اشوک کمار ورما نے ایک ہدایت نامہ جاری کیا تھا کہ علاقے میں کورونا کیس آنے کے بعد شادی کی تقریب میں صرف 5 افراد کے شرکت کی اجازت ہوگی۔
