عالمی وبا کورونا وائرس کے سبب عائد لاک ڈاؤن سے تقریباً سبھی شعبہائے زندگی متاثر ہوئے۔ جہاں لاکھوں افراد اس وائرس سے متاثر اور ہلاک ہوئے وہیں، تجارتی اداروں اور دکانداروں کی آمدنی پر بھی برے اثرات مرتب ہوئے۔
اتر پردیش کے ضلع جونپور میں قومی پرچم سے وابستہ کاروباری اور دکاندار بدحالی کے شکار ہیں۔ یوم آزادی کے بعد اب یوم جمہوریہ کے موقع پر بھی برائے نام بکری کے سبب انہیں مشکلات سے دوچار ہونا پڑ رہا ہے۔
جونپور سے تعلق رکھنے والے تاجروں نے ای ٹی وی بھارت سے بات کرتے ہوئے بتایا کہ انکی آمدنی کا برا حال ہے۔ گزشتہ برس یوم آزادی کے موقع پر بھی کورونا کی وجہ سے دکانیں اور تعلیمی ادارے بند تھے اور اب ان کی نگاہیں 26جنوری پر ٹکی ہوئی تھیں، تاہم اسکول بند ہونے کے سبب اس بار بھی انکی آمدن میں کوئی خاص اضافہ نہیں ہوا۔
انہوں نے کہا کہ یوم آزادی اور یوم جمہوریہ کے موقع پر ہی قومی پرچم اور اس سے متعلق دیگر اشیاء کی بھاری پیمانے پر خرید و فروخت ہوا کرتی ہے جس میں اسکولی طلباء بڑھ چڑھ کر قومی پرچم اور دیگر اشیاء کی خریداری کرتے تھے۔ تاہم آٹھویں درجے تک اسکول بند ہونے کی وجہ سے قومی پرچم اور دیگر اشیاء سے منسلک تاجروں کو اس بار بھی نقصان سے دوچار ہونا پڑا۔
