اترپردیش مدرسہ بورڈ: 'کامل' کی ڈگری سے 'ایم اے' میں داخلہ نہ ملنے پر طلبہ مایوس

دینی مدارس کے طلبہ و طالبات کو اعلیٰ تعلیم سے جوڑنے کے مقصد سے حکومت کا اترپردیش مدرسہ بورڈ فارغین کو دیگر پروگراموں کے ساتھ ساتھ کامل بھی کراتا ہے۔ ذمہ داران مدارس کے مطابق جو طلبہ عالمیت کے بعد بی اے کرنا چاہتے ہیں مدرسہ بورڈ ان کو بی اے کے مساوی کامل کراتا ہے۔

اترپردیش مدرسہ بورڈ کی جانب سے مدرسہ فارغین کو بی اے کے مساوی کرانے کے لئے کامل پروگرام کے امتحانات کرائے جاتے ہیں، لیکن ریاست اترپردیش کے ضلع رامپور میں قائم مدرسہ جامع العلوم فرقانیہ کے طلبہ اور پرنسپل نے ای ٹی وی بھارت سے بتایا کہ' مدارس کے فارغین طلبہ تقریباً 8 برس سے کامل کے امتحانات دے رہے ہیں لیکن کوئی بھی یونیورسٹی کامل کو بی اے کے مساوی ماننے کو تیار نہیں ہے'۔

اس متعلق مدرسہ جامع العلوم فرقانیہ کے پرنسپل مولوی ریحان خان ای ٹی وی بھارت سے خصوصی گفتگو میں بتایا کہ' اترپردیش مدرسہ بورڈ تقریباً 8 برس سے مدرسہ فارغین کو کامل کے امتحانات کرائے جارہے ہیں، لیکن جب یہ طلبہ کامل کے امتحانات پاس کرکے کسی دیگر تعلیمی ادارے میں جاکر کامل کی بنیاد پر مزید تعلیم حاصل کرنا چاہتے ہیں تو ان کی کامل کی ڈگری کو بی اے مساوی ماننے سے انکار کر دیا جاتا ہے۔ ایسے میں مدارس کے طلبہ و طالبات کا کافی نقصان ہوتا ہے'۔

انہوں نے کہا کہ' اگر اترپردیش مدرسہ بورڈ کامل کے امتحانات کراتا ہے تو حکومت کو چاہئے کہ کامل کی حیثیت کو برقرار رکھنے کے لئے بھی اقدامات کرے'۔