بدایوں: لاؤڈ اسپیکر سے لاک ڈاؤن اور ماسک کے متعلق بیداری

ضلع بدایوں میں لاک ڈاؤن اور ماسک نہ لگانے سے متعلق عوام کو آگاہ کرنے کے لیے مختلف میڈیا ذرائع کے ساتھ ساتھ قدیم روایتی طرز یعنی لاؤڈ اسپیکر کا بھی استعمال کیا جا رہا ہے۔

ریاست اترپردیش کے ضلع بدایوں میں ریاستی حکومت کے لاک ڈاؤن سے متعلق پابندیوں اور ماسک کے حوالے سے نئی گائیڈ لائنز کو عوام تک پہنچانے کے لیے قدیم روایتی طرز پر لاؤڈ اسپیکر کا استعمال کیا جارہا ہے۔

ضلع انتظامیہ کی جانب سے گاؤں میں یہ اعلان کیا جارہا ہے کہ ہر جمعہ کی رات 8 بجے سے لے کر پیر صبح 7 بجے تک ک مکمل لاک ڈاؤن رہے گا اور اس دوران ماسک نہ لگانے والوں پر پہلی مرتبہ میں 1000 روپے کا جرمانہ اور دوسری مرتبہ میں 10,000 روپے کا جرمانہ عائد کیا جائے گا اور ساتھ ہی تمام افراد کو گھروں پر رہنے کی سخت ہدایات دی جا رہی ہیں۔

واضح رہے کہ اتر پردیش کی ریاستی حکومت نے 23 تاریخ یعنی جمعہ سے ہر ہفتہ کو جمعہ کی شب 8 بجے سے لے کر پیر کی صبح 7 بجے تک مکمل لاک ڈاؤن کا اعلان کیا ہے اور اسی سلسلے میں گزشتہ اتوار کے روز مکمل طور پر کرفیو لاگو کیا گیا تھا۔