ریاست اترپردیش کے وزیر اعلیٰ یوگی آدتیہ ناتھ نے سیلاب متاثرہ علاقوں کا ہوائی معائنہ کرنے کے بعد میڈیا نمائندوں سے کہا کہ ہر دو تین سال میں ہمیر پور میں آنے والے سیلاب کو روکنے کے لئے محکمہ سینچائی کو پروجکٹ بنانے کو کہا گیا ہے۔ ضلع میں 90گاؤں سیلاب سے متاثر ہیں۔
انہوں نے کہا کہ سیلاب متاثرین کی ہر ممکن مدد کی جائے گی۔
یوگی آدتیہ ناتھ نے کہا کہ ’’راجستھان سے زیادہ پانی چھوڑے جانے سے سیلاب کا اثر ضلع میں آ گیا ہے۔ اس کے علاوہ ایس ڈی آر ایف کی ٹیم کو تعینات کر دیا گیا ہے۔ پہلے سے ہی آفت راحت فنڈ سے متاثرین کو انتظامیہ کی ذریعہ مدد کی جا رہی ہے۔‘‘
انہوں نے مزید کہا کہ سیلاب ختم ہونے کے بعد متعدی امراض کے پھیلنے کا خطرہ پیدا ہوگا، اس کے لئے پہلے سے ہی بچاؤ کی تراکب کر لی گئی ہیں۔ کسی بھی سیلاب متاثر کو کوئی بھی تکلیف نہیں ہونے دی جائے گی۔
مزید پڑھیں؛ بدایوں: حکومت کے دعوے زمینی حقیقت سے بہت دور
اس سے پہلے وزیر اعلیٰ نے سیلاب متاثرین سے ملاقات کی۔ انہوں نے کہا کہ سبھی کو گاڑی سے راحت کیمپوں میں پہنچایا جائے گا۔
قابل ذکر ہے کہ وزیر اعلیٰ کا پروگرام شہر سے ایک کلو میٹر دور سیلاب راحت کیمپ ڈگر کالج کچھے چھا میں رکھا گیا تھا لیکن اچانک پروگرام بدل کر ہمیر پور کلکٹریٹ میں رکھا گیا جس سے سینکڑوں متاثرین اپنی بات وزیر اعلی کے سامنے نہیں رکھ سکے۔
