ریاست اترپردیش کے امروہہ ضلع میں ٹماٹر کے کاشتکاروں کو لاک ڈاؤن کے باعث کافی نقصان اٹھانا پڑا ہے۔ امروہہ ضلع میں تقریبا 200 ہیکٹر میں ٹماٹر کی فصل کھڑی ہے، لیکن ایکسپورٹ نہ ہونے کی وجہ سے ٹماٹر بہت کم قیمت پر فروخت ہو رہا ہے، جس کی وجہ سے کاشتکاروں کی فصل کی لاگت بھی نہیں نکل پا رہی ہے۔
ٹماٹر کاشت کاروں کا کہنا ہے کہ لاک ڈاؤن کی وجہ سے کسان اپنے ٹماٹر باہر نہیں بھیج سکے جس کی وجہ سے ٹماٹر کھیت میں ہی رہا اور پگھلنے لگا۔ کاشتکاروں کا کہنا ہے کہ ٹماٹر کی فصل کی دیکھ بھال پر بہت پیسہ خرچ کیا جاتا ہے، لیکن اس بار لاک ڈاؤن کی وجہ سے قیمت وصول نہیں ہو سکی ہے، جس کی وجہ سے بہت زیادہ نقصان ہوا ہے۔
اہم بات یہ ہے کہ لاک ڈاؤن کے بعد کسانوں کا ٹماٹر بیرون ممالک نہیں جا سکا اور نہ ہی منڈیوں میں مکمل طور پر فروخت ہوا۔ ٹماٹر اگانے والے کاشتکاروں سے بات کرنے کے بعد پتہ چلا کہ اس بار آمدنی اخراجات سے کہیں کم رہی ہے۔ تاہم ضلعی انتظامیہ نے یہ سارا معاملہ حکومت کو پہنچا دیا ہے اور نقصانات کا اندازہ بھی شروع کر دیا گیا ہے۔
