جون کے دوسرے ہفتے میں امتحانات کے نتائج کا اعلان متوقع

ہائی اسکول اور انٹرمیڈیٹ امتحانات کی کاپیوں کی جانچ کا بالآخر آغاز ہو گیا، جس کا طویل عرصہ سے انتظار کیا جارہا تھا۔ کاپی جانچ کرنے والے عملہ، گورنمنٹ انٹر کالج بہرائچ، مہاراج سنگھ انٹر کالج اور تارا گرلس انٹر کالج بہرائچ میں جمع کی گئی کاپیوں کو جانچنا شروع کر چکے ہیں۔

گورنمنٹ انٹر کالج اور مہاراج سنگھ انٹر کالج میں انٹرمیڈیٹ کی اور تارا گرلس انٹر کالج میں ہائی اسکول کی کاپیوں کی جانچ کی جا رہی ہے۔

بہرائچ کے تین مراکز پر ہائی اسکول اور انٹرمیڈیٹ امتحانات کی کاپیوں کی جانچ کا کام شروع ہو گیا ہے۔ آج ضلع مجسٹریٹ بہرائچ شمبھو کمار نے ان مراکز کا دورہ کیا اور ضروری ہدایت دی۔

شمبھو کمار نے متعلقہ افسران سے کہا کہ کورونا وائرس کے خطرات کو ملحوظ رکھتے ہوئے جانچ کرنے والے اساتذہ کورونا وائرس سے محفوظ رہیں، اس کے لیے احتیاطی تدابیر مثلا صاف صفائی، صاف پینے کا پانی وغیرہ کا انتظام بھی کیا جائے۔

کسی رکاوٹ کے بغیر آسان و پُرسکون آمد و رفت کو یقینی بنانے کے لیے پولیس پاس بھی دیئے گئے ہیں۔ توقع ہے کہ جون کے دوسرے ہفتہ میں انٹرمیڈیٹ نتائج کا اعلان کردیا جائے گا-اب تک گورنمنٹ انٹر کالج میں 8647، تارا گرلس انٹر کالج میں 15132 اور مہاراج سنگھ انٹر کالج میں 6303 کاپیاں جانچی جا چکی ہیں-