ریاست اترپردیش کے ضلع بلرامپور کے ہریاست گھروا علاقے میں ایک شخص سے رشوت مانگنے اور مارپیٹ کا ویڈیو سوشل میڈیا پر وائرل ہونے کے معاملے میں جمعہ کو قصوروار پولیس اہلکار کو ایس پی نے معطل کر دیا ہے۔
سپرنٹندنٹ آف پولیس دیورنجن ورما نے بتایا کہ ایک ویڈیو سوشل میڈیا پر وائرل ہورہا ہے جس میں موتی پور گاؤں کے رہنے والے رمیش گری نامی شخص نے سپاہی اوم پرکاش یادو پر رشوت طلب کرنے اور مارپیٹ کرنے کا الزام لگایا ہے۔
واضح رہے کہ ویڈیو میں رمیش کے پیٹھ پر چوٹ کے نشان بھی ہیں۔
سوشل میڈیا پر وائرل ہورہے ویڈیو کا نوٹس لیتے ہوئے معاملے کی جانچ کرائی گئی اور جانچ میں سردست ویڈیو میں عائد کیے گئے الزامات صحیح ثابت ہورہے ہیں۔
اس جانچ کے بعد قصوروار سپاہی کو معطل کردیا گیا ہے۔ تاہم معاملے کی آگے کی جانچ کرائی جارہی ہے۔
