ملک کی حفاظت کرتے اپنی جان نچھاور کرنا یقینا یہ ایک قابل ستائش عمل اور بڑا کام ہے، لیکن اس فخر کو ایک شہید کے والد سے بہتر کوئی اور نہیں سمجھ سکتا ہے۔
پلوامہ حملے میں شہید ہوئے شاملی کے امیت کوری کے والد کو بھی اپنے بیٹے پر بڑا فخر اور ناز ہےکہ ان کا بیٹا ملک کی حفاظت کرتے ہوئے شہید ہوا۔
ریاست اتر پردیش کے شہر شاملی کے رہنے والے شہید امیت کوری کے گھر کو ان کی شہادت کے بعد مقامی لوگوں نے مندر کی طرح پوجنا شروع کردیا ہے جو ان کے والد کے لیے بے حد خوشی کی بات ہے۔
شہید کے گھر سے گزرنے والا ہر شخص ان کی چوکٹ پر اپنے سر کو جھکاتا ہے پھر آگے بڑھتا ہے، ساتھ ہی شہید کے والدین اپنے دن کی شروعات بھی شہید بیٹے کی آرتی اتار کر ہی کرتے ہیں۔ پلوامہ حملے میں شہید ہوئے امیت کوری کا گھر شاملی کے کڑانا سڑک پر واقع ہے، اہل خانہ کے مطابق اپنے شہید بیٹے کی وجہ سے لوگ ان کی عزت کرتے ہیں۔
شہید امیت کوری کی تصویر کے سامنے ہر وقت ایک دیا روشن رہتا ہے، شہید کے اہل خانہ ہر صبح سب سے پہلے ان کی آرتی اتارتے ہیں پھر کوئی دوسرا کام کرتے ہیں۔
شہید کی اس بہادری اور قربانی پر صرف علاقے کے لوگ ہی نہیں بلکہ انتظامیہ بھی ان کی شہادت کے بعد اہل خانہ پر کافی توجہ دیتی ہے۔
امیت کوری کی شہادت کے بعد ان کے چھوٹے بھائی کو ان کے عوض حکومت نے نوکری دی ہے۔
مزید پڑھیں:'نفرت انگیز بیانات سے بی جے پی کو نقصان ہوا'
امیت کوری کے شہادت کےبعد ان کے اہل خانہ نے حکومت سے درخواست کی تھی کہ ان کے بیٹے کی شہادت کے بعد ایک 'اسمارک' کی بھی تعمیر ہو جسے انتظامیہ مانا اور اس کا تعمیراتی کام بھی مکمل ہونے پر ہے۔ اہل خانہ کے مطابق جلد ہی اس کا افتتاح عمل میں لایا جائیگا۔
واضح رہے کہ 14فروی سنہ 2019 میں پلوامہ واقعہ پیش آیا تھا جس میں سرحد پر کھڑے جوان بہادروں نے ملک کی حفاظت کرتے ہوئے اپنی جان کی قربانی پیش کی تھی۔
