رکن پارلیمنٹ کنور دانش علی نے کہا کہ ہمارے ملک میں 100 برس پورے کرنے والے ادارے کو 100 کروڑ کی خصوصی گرانٹ دینے کی روایت رہی ہے، اس رقم کا استعمال ادارے کے تعلیمی انفراسٹرکچر کو مزید مستحکم بنانے کے لیے کیا جاتا ہے، مگر جامعہ ملیہ اسلامیہ کو سو برس کے انتہائی کامیاب اور تاریخی سفر مکمل کرنے کے موقع پر کوئی صد سالہ مالی مدد نہیں ملی۔
یوم اساتذہ کے موقع پر جامعہ ٹیچرس ایسوسی ایشن نے آپ سے یونیورسٹی کے بنیادی ڈھانچے اور تعلیمی و تحقیقی سہولیات کو بہتر بنانے کے لیے ایک سو کروڑ روپے کی گرانٹ جاری کرنے کی درخواست کی تھی، اس سلسلے میں آج تک آپ کی طرف سے کوئی پہل نہیں کی گئی ہے۔
انہوں نے کہا کہ اس برس جامعہ ملیہ اسلامیہ اپنی صد سالہ جشن منارہا ہے، یہ ایک مرکزی یونیورسٹی جامعہ ملیہ اسلامیہ ہے جس کا خواب تحریک آزادی کے دوران دیکھا گیا تھا اور اسے تحریک آزادی کے مجاہدین نے ایک حقیقی شکل دی تھی۔
جامعہ کی ہمہ جہت حصولیابیوں کی بے پناہ کوششوں کا پھل ملا ہے اور جامعہ ملیہ اسلامیہ نے وزارت ترقی انسانی وسائل کی رینکنگ میں پہلی پوزیشن حاصل کی ہے، جامعہ نے بین الاقوامی درجہ بندی میں اپنی پوزیشن میں نمایاں بہتری لائی ہے، یہ کارنامے طلبہ، اساتذہ ، انتظامیہ اور عملہ کی سخت محنت سے ممکن ہوسکے ہیں۔
