ریاست اترپردیش کے ضلع سلطان پور کے لمبھوا علاقے میں لگاتار ہو رہی بارش کی وجہ سے ہفتہ کو ایک کچا مکان منہدم ہو گیا جس کے ملبے کے نیچے دب کر ایک خاتون کی موت ہوگئی جبکہ دیگر 4 افراد زخمی ہوگئے۔
پولیس ذرائع نے بتایا کہ جمعہ سے لگاتار ہو رہی بارش کی وجہ سے سلطانپور میں لمبھوا علاقے کے ترئیں گاؤں کے باشندہ کھیدورام کا کچا مکان منہدم ہو گیا۔ اس حادثے میں مکان کے ملبے کے نیچے دبنے سے کھیدورام کی بیوی سومواری (52) بیٹے انل، سورج، ابھیشیک اور بیٹی انتما زخمی ہو گئے۔
انہوں نے بتایا کہ آس پاس کے مقامی افراد نے کسی طرح سے ملبے کے نیچے سے سبھی کو باہر نکالا لیکن تب تک سومواری کی موت ہو چکی تھی۔
سبھی زخمیوں کو سی ایچ سی لمبھوا میں علاج کے لئے داخل کرایا گیا۔ اطلاع ملنے کے بعد موقع پر پہنچی پولیس نے خاتون کی لاش کو پوسٹ مارٹم کے لئے بھیج دیا ہے۔
