’اگرعوام اور پارٹی چاہے گی تو اسمبلی انتخاب لڑوں گا‘

بی ایس پی حکومت کے سابق وزیر نواب کاظم علی خاں عرف نوید میاں نے یوپی اسمبلی انتخابات 2022 میں انتخاب لڑنے کے متعلق کہا کہ اگر کانگریس پارٹی اور رامپور کی عوام چاہے گی تو وہ رامپور شہر کی سیٹ سے اسمبلی انتخاب میں حصہ لے سکتے ہیں۔

ریاست اترپردیش کے رامپور میں ہولی ملن پروگرام کا انعقاد کیا گیا، جس میں بی ایس پی حکومت کے سابق وزیر نواب کاظم علی خاں عرف نوید میاں نے صحافیوں سے بات کرتے ہوئے کہا کہ اگر ان کی کانگریس پارٹی اور رامپور شہر کی عوام چاہے گی تو وہ 2022 کے یوپی اسمبلی انتخابات میں رامپور شہر سیٹ سے انتخاب لڑیں گے۔

انہوں نے سماجوادی پارٹی کے رکن پارلیمنٹ اعظم خاں پر کاروائیوں کو درست قرار دیتے ہوئے کہا کہ وہ اپنے ظلم اور جرم کی سزا کاٹ رہے ہیں، ہولی ملن تقریب کے موقع پر نوید میاں بی جے پی کیمپ میں بھی پہنچے جہاں انہوں نے بی جے پی رہنماؤں کو ہولی کی مبارکباد پیش کی۔