سماج وادی پارٹی (ایس پی) کے سربراہ اکھلیش یادو نے کہا کہ مہنگائی اور فصل کی مناسب قیمتیں نہ ملنے سے دہری مار جھیل رہے کسانوں کے معاملے میں برسر اقتدار بی جے پی حکومت بے حسی کا مظاہرہ کر رہی ہے۔
یادو نے پیر کو لکھنئو میں بیان جاری کرتے ہوئے کہا کہ ’’کسانوں کو امید تھی کہ انہیں بی جے پی لیڈروں کے وعدوں کے مطابق فصلوں کے اخراجات کی ڈیڑھ گنا قیمت مل جائے گی اور ان کی آمدنی دگنا ہو جائے گی، انہوں نے بھی خواب دیکھا تھا کہ اب وہ بھی خوشحال زندگی جئیں گے لیکن دھوکہ باز حکومت میں سربراہ ادھورے وعدوں کے ساتھ عوام کے درمیان جھوٹی بیان بازی میں مشغول ہیں۔‘‘
انہوں نے کہا کہ ’’چار سال میں گنے کی قیمت ایک روپئے بھی نہ بڑھانے والی بی جے پی حکومت کے چار دن ہی رہ گئے ہیں۔ کسان دھوکے کا جواب اپنے ووٹ سے دیں گے۔ رواں سیشن میں بھی گنے کی قیمتیں کم ہی ہیں۔‘‘
مزید پڑھیں؛'یہ جہاز خرید سکتے ہیں لیکن کسانوں کا بقایا معاف نہیں کر سکتے'
سابق وزیر اعلیٰ نے کہا کہ گنا کسان کتنی بدحالی میں جی رہے ہیں اس بات سے واضح ہو جاتا ہے کہ اس وقت چینی ملوں پر یومیہ دوکروڑ روپئے بقایا ہو رہا ہے۔ اب تک ریاست میں گنا کسانوں کا تقریبا 10174کروڑ روپئے بقایا ہو چکا ہے۔ اس کے ساتھ قانونی طور پر سود دینا ہوتا ہے جو نہیں دیا جا رہا ہے۔ پریشان گنا کسان خودکشی کو مجبور ہوجاتاہے۔
یادو نے دعویٰ کیا کہ ان کی پارٹی ہمیشہ کسانوں کے مفاد کے لئے جدوجہد کرتی رہے گی، ’’کسان یاترا، سماج وادی کسان گھیرا، ٹریکٹر کے ساتھ پرچم کشائی پروگرام سماج وادی پارٹی نے حال ہی میں کسانوں کے حمایت میں کئے تھے۔ آگے بھی کسانوں کے ہر مطالبے کے ساتھ سماج وادی پارٹی رہے گی۔‘‘
