اتر پردیش کے بارہ بنکی ضلع کے دریہ باد واقع مدرسہ دارالقرآن کے 14 سالہ طالب علم محمد انس بن عبدالمتین نے نے پیر کے روز ساڑھے سات گھنٹے میں ایک نشست میں مکمل قرآن کریم سنایا۔ مدرسہ میں تقریب کے دوران 14 سالہ طالب علم کی کافی پزیرائی کی گئی۔
تقریب کے دوران مولانا محمد وقار ندوی نے اپنے خطاب میں کہا کہ جب مسلمان قرآن مجید کو حفظ کرنا شروع کرتا ہے تو وہ اپنے قلب کی عمیق گہرائیوں میں توفیق الاہی اور سعادت عظیم کا سرور سرایت کرتے ہوئے محسوس کرتا ہے کہ یہ وہ نورانی سعادت ہے، جس کے مد مقابل تمام لطف و کرم اور سعادتیں ثانوی درجہ رکھتی ہیں۔ حافظ قرآن پر رب کریم کے تعلق کا دروازہ کھول دیا جاتا ہے۔
مہمان خصوصی کے طور پر موجود مولانا وقار ندوی نے کہا کہ اللہ عزوجل کی مدد و نصرت حافظ قرآن پر ہونا شروع ہو جاتی ہے۔ انہوں نے کہا کہ قرآن مجید کا حفظ کرنا اللہ کا معجزہ ہے۔ یہ دنیا کی واحد کتاب ہے جس کے حافظ دنیا کے گوشے گوشے میں ہے۔ نونہال بچے بھی قرآن کا حفظ باآسانی کر لیتے ہیں۔
