لکھنؤ: کانگریس رہنما شاہنواز عالم گرفتار

شہریت ترمیمی بل کے خلاف احتجاج میں شامل ہونے کا الزام لگایا گیا ہے، تھانے پہنچے کانگریس کارکنان پر پولیس نے لاٹھی چارج کیا ہے۔

اُتر پردیش اقلیتی کانگریس کمیٹی کے چیئرمین شاہنواز عالم کو پولیس نے گزشتہ رات اتر پردیش کے لکھنؤ واقع گولف اپارٹمینٹ سے گرفتار کر لیا ہے۔
شاہنواز عالم کو گرفتار کیوں کیا گیا؟ اس کی وجوہات کے بارے میں پولیس نے پہلے کوئی بیان جاری نہیں کیا لیکن دیر رات اس بات کی تصدیق ہوئی کہ انہیں 19 دسمبر 2019 کو لکھنؤ میں ہوئے شہریت ترمیمی بل کے خلاف پرتشدد مظاہرے میں شامل ہونے کے متعلق گرفتار کیا گیا ہے۔
شاہنواز عالم کی گرفتاری کی خبر ملتے ہی کانگریس پارٹی کے ریاستی صدر اجے کمار للو، اردھنا مشرا اور دوسرے رہنما حضرت گنج کوتوالی پہنچ کر پولیس افسران سے بات کی لیکن معاملہ حل نہیں ہوا۔

اس کے بعد کانگریسی کارکنان نے کوتوالی میں ہی پولیس کے خلاف جم کر نعرے بازی کی، جواب میں پولیس نے لاٹھی چارج کر کے کانگریسی کارکنان کو کوتوالی سے باہر نکال دیا۔قابل ذکر ہے کہ اس سے پہلے ریاستی صدر اجے کمار بھی ایک ماہ جیل میں گزار کر رہا ہوئے ہیں۔