آیودھیا: سڑک حادثے میں 20 مزدور زخمی

گزشتہ ایک ماہ سے بھی زائد مدت تک ملک میں مکمل لاک ڈاون نافذ ہونے کی وجہ سے سڑک حادثات میں کمی آگئی تھی لیکن جیسے ہی اس میں نرمی برتی گئی سڑک حادثات میں اضافہ ہونے لگا ہے، تازہ واقعہ اترپردیش کے آیودھیا کا ہے۔

ایودھیا کے جنورا ناکہ بائی پاس کے قریب قومی شاہراہ نمبر 28 پر پک اپ اور ٹرک کے درمیان ٹکر میں کم از کم 20 مہاجر مزدور زخمی ہو گئے، زخمیوں کو اسپتال میں داخل کرایا گیا ہے، جس میں دو کی حالت تشویشاناک بتائی جا رہی ہے۔

اس حادثے کی اطلاع ملتے ہی ریاست کے وزیر اعلی یوگی آدتیہ ناتھ نے ضلع مجسٹریٹ اور سینیئر پولیس سپریٹینڈنٹ کو جائے وقوع پر پہنچ کر سبھی زخمیوں کو مناسب علاج کرانے کا حکم دیا ہے۔

موصول اطلاعات کے مطابق یہ سبھی مزدور ممبئی سے سدھارتھ نگر جا رہے تھے اسی دوران آیودھیا میں یہ حادثہ ہوگیا۔