نمائندے کے مطابق چھوٹی پورہ ہندوارہ کی عوام نے پینے کے صاف پانی کی شدید قلت کے سبب بارہمولہ - ہندوارہ سڑک پر دھرنہ دیکر احتجاج کیا جس کے سبب ٹریفک کی نقل و حمل کافی دیر تک متاثر رہی۔
احتجاجیوں کا کہنا تھا کہ انکے علاقے میں کئی مہینوں سے پینے کے صاف پانی کی قلت ہے جس کے بارے میں انہوں نے ضلع انتظامیہ اور متعلقہ محکمے کو کئی بار آگاہ کیا، تاہم ’’انہوں نے اس بارے میں کبھی سنجیدگی سے غور نہیں کیا۔‘‘
انکا کہنا تھا کہ دو مہینے قبل انہوں نے اسی طرح سڑک پر احتجاج کیا اور انتظامیہ نے دو ہفتے کی مہلت مانگی تھی جبکہ ’’دو مہینے گزرنے کے بعد بھی کوئی پیش رفت نہیں ہوئی۔‘‘
احتجاجیوں نے الزام عائد کرتے ہوئے کہا کہ ’’محض تیس پائپوں کو بچھانے کے بعد علاقے میں پانی کی قلت کا مسئلہ حل ہو سکتا ہے۔‘‘
احتجاج کے بعد پولیس اور انتظامیہ کے افسران نے موقعے پر پہنچ کر احتجاجیوں کو دو دن میں انکی مشکلات حل کرنے کا وعدہ کیا۔
