مرکز کے زیر انتظام جموں و کشمیر کے کولگام میں واقع بوگنڈ علاقے میں کورونا کیسز میں اضافے کے پیش نظر علاقے کو کنٹینمنٹ زون میں تبدیل کر دیا گیا ہے۔
انتظامیہ نے آمدورفت پر قدغن لگائی ہے جبکہ علاقے کو حساس قرار دیتے ہوئے لوگوں کو گھروں میں ہی رہنے کی تلقین کی گئی ہے۔
وہیں کورونا وائرس کے خدشات کے پیش نظر ضلع کولگام میں انتظامیہ کے حکم نامے کے بعد پورے ضلع میں مرحلے وار طریقوں سے دُکانیں و دیگر کئی کاروباری اداروں نے احکامات پر عمل کیا۔ دراصل انتظامیہ نے علاقے میں مرحلے وار طریقے سے دُکانوں کو کھولنے کی اجازت دی ہے۔
اس دوران ضلع کے تمام علاقہ جات میں دُکانیں و ٹرانسپورٹ نظام بھی کسی حد تک متاثر رہا۔
ضلع ترقیاتی کمشنر بلال محی الدین بٹ کے مطابق ضلع کے ڈگری کالج، انڈسٹریل ٹریننگ انسٹی ٹیوٹ، جے این ایم اکلاویہ کالج سمیت چھ الگ الگ عمارتوں کو کووڈ مراکز میں تبدیل کیا گیا ہے، جن میں ایک ہزار سے زیادہ مریضوں کے لئے انتظامات کئے گئے ہیں۔
واضح رہے کہ ضلع میں کئی علاقوں کو کنٹینمنٹ زون میں رکھا گیا ہے اور ان علاقوں کے آنے جانے کے راستوں کو تاروں سے بند کیا گیا ہے۔
