وانپورہ کھڈونی کولگام میں گزشتہ روز سکیورٹی فورسز اور عسکریت پسندوں کے درمیان جھڑپ سے قبل سکیورٹی فورسز نے یہاں چھپے ہوئے عسکریت پسندوں کو خودسُپردگی کرنے کی پیش کش کی تھی اور کئی مرتبہ انہں آگاہ کیا کہ وہ ہتھیار چھوڑ کر باہر آجائیں اور خود سُپردگی کر دیں۔
اس سلسلہ میں ایک ویڈیو بھی موصول ہوا ہے جس میں سیکورٹی فورسز اہلکار عسکریت پسندوں کو خود سپردگی کرنے کو کہہ رہے ہے۔ تاہم عسکریت پسندوں نے پیشکش ٹھکرا دی اور اس کے بعد تصادم شروع ہوگیا، جس میں دو عسکریت پسند مارے گئے ۔ عسکریت پسندوں کے قبضہ سے اسلحہ و بارود بھی برآمد کیا گیا۔
ویڈیو میں پولیس اہلکار یہ کہتے ہوئے سنے جاسکتے ہیں کہ 'اندر کوئی ہے، اگر ہے تو باہر آجاؤ، آپ کو 5 منٹ دیئے جاتے ہیں، 5 منٹ کے اندر اندر باہر آجاؤ، اگر باہر آئے، تو کپڑے نکال کر آنا، ہتھیار نیچے رکھ کر باہر آنا، آپ کو موقع دیا جا رہا ہے کہ آپ سرینڈر کرو۔'
واضح رہے جنوبی کشمیر کے ضلع کولگام کے ونپورہ علاقے میں ہفتے کی صبح عسکریت پسندوں اور سیکیورٹی فورسز کے درمیان ہوئے تصادم میں دو عسکریت پسند ہلاک ہوئے۔
ہلاک شدہ عسکریت پسندوں کی شناخت عسکری تنظیم حزب المجاہدین کے شاکر احمد اور بلال احمد کے طور پر ہوئی ہے اور دونوں مقامی ہیں۔
