مودی کے دور حکومت میں بے روزگاری کی شرح سب سے زیادہ: ترنمول

ترنمول کانگریس اور بی جے پی کے درمیان جاری زبانی جنگ کے درمیان ترنمول کانگریس کے سینئر رکن پارلیمان سوگاتا رائے نے آج کہا ہے کہ بی جے پی کو ملک اور یہاں کی عوام کی فکر نہیں ہے اسی وجہ سے آج ملک کی تاریخ میں بے روزگاری کی شرح سب سے زیادہ ہے ۔یہ صورت حال ملک کی اس وقت بھی نہیں تھی جب ملک آزاد ہوا تھا ۔

سوگت رائے نے ممتا بنرجی کے بھتیجے اور ممبر پارلیمنٹ ابھیشیک بنرجی کا دفاع کرتے ہوئے کہا کہ سیاست میں دلیپ گھوش سے زیادہ ابھیشیک بنرجی کا تجربہ ہے ۔انہوں نے کہا کہ بی جے پی لیڈران ابھیشیک بنرجی کا نام لئے بغیر اشاروں میں تنقید کرتے ہیں اور جھوٹے الزامات لگارہے ہیں ۔کیوںکہ انہیں معلوم ہے کہ وہ جھوٹ بول رہے ہیں اور اگرنام لے کر الزامات لگائے تووہ پھنس سکتے ہیں ۔

سوگت رائے نے کہا کہ بنگال میں لا اینڈ آرڈر کی صورت حال بی جے پی کے زیر اقتدار ریاستوں سے کہیں بہتر ہے ۔اترپردیش میں ہر دن عصمت دری کی خبر یں آتی رہتی ہیں ، بہار میں کھلے عام فائرنگ ہورہی ہے اور مدھیہ پردیش میں ہم سب نے دیکھ لیا ہے کہ کس طریقے سے غنڈہ گردی کی جارہی ہے ۔انہوںنے کہا کہ صرف بھرم پھیلانے کےلئے انتخابات سے قبل مرکزی فورسیس کی تعیناتی کا مطالبہ کیا جارہا ہے۔جب کہ یہ جانتے ہیں کہ انتخابات کی تاریخ کا اعلان ہونے سے قبل ریاستی حکومت کی مرضی کے بغیر مرکزی فورسیس کی تعیناتی نہیں ہوسکتی ہے ۔

انہوں نے کہا کہ نریندر مودی حکومت کی کوئی بھی اسکیم کامیاب نہیں ہوئی ہے ۔2020تک ملک بھر میں 100اسمارٹ سٹی بنانے کا دعویٰ کیا گیا تھا مگر اب کہا جارہا ہے کہ 2023تک 34شہروں کا کام ہوجائے گا ۔

سوگت رائے نے بلٹ ٹرین کا ذکر کرتے ہوئے کہا کہ احمد آباد سے ممبئی جانے والی بلٹ ٹرین میں 3 بلین ڈالر تباہ ہوگئے۔ اب وہی وندے بھارت ایکسپریس ٹرین بند ہوگئی ہے۔ بلٹ ٹرین کے لئے ریلوے روٹ کی تیاری میں 180 کروڑ روپے خرچ ہوئے ہیں۔رائے نے میڈیا کو بتایا کہ گذشتہ سال مرکزی حکومت نے کوئی نیا دفاعی منصوبہ شروع نہیں کیا تھا۔ چین کے ساتھ 48 بلین ڈالر کا تجارتی خسارہ ہے۔ آزادی کے بعد اب بے روزگاری کی شرح سب سے زیادہ ہے۔

یو این آئی