مغربی بنگال کے شمالی 24 پرگنہ میں کورونا وائرس کے بڑھتے ہوئے کیسز کے مدنظر ترنمول کانگریس کے نومنتخب رکن اسمبلی راج چکرورتی نے سیف ہوم کا افتتاح کیا۔
اس موقع پر رکن اسمبلی راج چکرورتی نے ای ٹی وی بھارت سے گفتگو کرتے ہوئے کہا کہ سیف ہوم کا مقصد کورونا کے مریضوں کو نہ صرف معیاری علاج مہیا کرانا ہے بلکہ گھر جیسی مکمل سہولیات بھی فراہم کرنا ہے۔
انہوں نے کہا کہ ریاستی حکومت اور محکمہ صحت کورونا وائرس کی دوسری لہر کو مزید پھیلنے سے روکنے کی مکمل کوشش کر رہے ہیں اور عوام کو کورونا سے نمٹنے کے لیے بڑھ چڑھ کر حصہ لینے کی ضرورت ہے۔
رکن اسمبلی کا کہنا ہے کہ کورونا گائڈ لائنس پر سختی سے عمل کرتے ہوئے ہی ہم کورونا وائرس کو جڑ سے اکھاڑ پھینکیں گے۔ دوسری طرف رکن اسمبلی نے عیدالفطر کے موقع پر مغربی بنگال کے عوام کو عید کی بہت بہت مبارکباد دیتے ہوئے کہا کہ عید خوشیوں کا تہوار ہے اس لیے ہم لوگ جوش و خروش کے ساتھ ساتھ کورونا گائڈ لائنس پر عمل کرتے ہوئے منائیں گے۔
انہوں نے کہا کہ تہوار کے موقع پر ہمیں اپنوں کو اس بیماری سے محفوظ رکھنا ہے، اس لیے ہم بھیڑ اور جماعت سے بچنے کی کوشش کریں گے.
سیف ہوم کے موقع پر رکن اسمبلی راج چکرورتی کے ساتھ بیرکپور کمشنریٹ آئی پی ایس منوج کمار برما بھی موجود تھے، انہوں نے کہا کہ اس وقت ہم سبھوں کی پہلی اور آخری ترجیح اپنے آپ کو اس بیماری سے محفوظ رکھنا ہے۔
