ترنمول کانگریس کی سربراہ ممتا بنرجی نے بھی ٹویٹر پر اس واقعہ کی مذمت کرتے ہوئے متاثرہ کے لئے انصاف کا مطالبہ کیا ہے۔
دوسری جانب ممتا بنرجی نے آئندہ کل یعنی 3 اکتوبر کو شام 4 بجے اس واقعہ کے خلاف احتجاجی ریلی نکالنے کا اعلان کیا ہے۔
اس دوران ممتا بنرجی برلا پلانیٹیرئم سے میو روڈ گاندھی مجسمہ تک پیدل مارچ کریں گی جبکہ آج ترنمول کانگریس کی خاتون شاخ کی جانب سے دھرمتلہ میں موم بتی مارچ نکالا گیا۔
وہیں ترنمول کانگریس کے وفد کو جس طرح متاثرہ خاندان سے ملنے سے روکا گیا اور یوپی پولیس نے ترنمول کانگریس کے رہنما ڈیریک اوبرائن، کاکولی گھوش دستیدار اور دوسرے رہنماؤں کے ساتھ جس طرح کا سلوک کیا۔ اس کے خلاف آج ترنمول کانگریس کی طرف سے ایک بیان جاری کیا گیا ہے جس میں کہا گیا ہے کہ متاثرہ خاندان سے ملاقات کے لئے مقامی انتظامیہ سے بار بار اپیل کرنے کے باوجود ان کو متاثرہ خاندان سے ملنے کی اجازت نہیں دی گئی۔ دفعہ 144 کا حوالہ دے کر ان کو اندر جانے نہیں دیا گیا۔ ہم پر امن طور پر متاثرہ خاندان سے ملنے جا رہے تھے۔ اس کے باو جود ہمیں ملنے نہیں دیا گیا۔ یوپی میں جنگل راج چل رہا ہے۔
ہاتھرس واقعہ پر ممتا بنرجی کا کہنا ہے کہ قصورواروں کے خلاف جلد از جلد کارروائی کی جائے۔
