مغربی بنگال کی وزیر اعلی ممتا بنرجی نندی گرام میں انتخابی مہم کے دوران زخمی ہوگئیں۔ اس معاملہ پر در عمل ظاہر کرتے ہوئے انہوں نے اسے حملہ کی سازش قرار دیا ہے۔ ممتا کے زخمی ہونے پر ٹی ایم سی کے کارکنان ناراض ہیں۔ وہیں، انہوں نے الیکشن کمیشن سے شکایت کرنے کا فیصلہ کیا ہے'۔
وزیر اعلیٰ ممتا بنرجی نے آج کہا کہ نندی گرام میں کچھ لوگوں نے انہیں ڈھکیل دیا ہے جس کی وجہ سےان کے پائوں میں شدید چوٹ لگی ہے۔
خیال رہے کہ آج ہی وزیر اعلیٰ ممتا بنرجی نے نندی گرام اسمبلی حلقے سے پرچہ نامزدگی داخل کی ہے۔ اطلاعات کے مطابق ممتا بنرجی کو چار سے پانچ لوگوں نے دھکا دیا اس وقت ان کے ساتھ سیکورٹی اہلکار موجود نہیں تھے۔
ممتابنرجی نے کہا کہ انہیں جان بوجھ کر دھکا دیا گیا ہے وہ کولکاتا لوٹ رہی ہیں اور ڈاکٹر کو دکھائیں گی۔ ممتا بنرجی نے کہا کہ الیکشن کمیشن سے اس معاملے کی شکایت کی جائے گی۔ دوسری جانب بی جے پی نے کہا ہے کہ ممتا بنرجی عوامی ہمدرد لینے کے لیے ڈرامہ کررہی ہیں۔
یواین آئی
