مغربی بنگال میں کورونا وائرس کی دوسری لہر کے درمیان اسمبلی انتخابات 2021 کے آٹھویں اور آخری مرحلے میں ووٹنگ کا سلسلہ جاری ہے۔
ریاست کے چار اضلاع کولکاتا، بیربھوم، مالدہ اور مرشدآباد کی 35 سیٹوں پر سخت سکیورٹی انتظامات کے درمیان ووٹنگ کے دوران کہیں کورونا گائیڈ لائن پر سختی سے عمل کیا جا رہا ہے تو کہیں گائیڈ لائن کو نظر انداز کیا جارہا ہے۔
بیشتر پولنگ مراکز پر ووٹرز خودبخود سماجی فاصلہ بنا کر ووٹ ڈالنے کے لیے قطار میں کھڑے دکھائی دیے تو کہیں اس کی خلاف ورزی کرتے ہوئے نظر آئے۔
حالانکہ انتخابی کمیشن، کولکاتا پولیس اور مغربی بنگال پولیس نے پولنگ مراکز پر سماجی فاصلے کی نشاندہی کے لیے دائرے بنا رکھے تھے۔ اس کے باوجود مختلف مقامات پر کچھ لوگ اس کی خلاف ورزی کرتے ہوئے پائے گئے۔
پولیس انتظامیہ بھی ووٹرز پر کورونا گائیڈ لائن پر عمل کرنے کے لیے سختی برتنے سے گریز کرتا نظر آیا۔ اس سلسلے میں لوگوں اور ڈیوٹی پر تعینات پولیس اہلکاروں سے بات کرنے کی کوشش کی گئی تو وہ کیمرے کے سامنے کچھ بھی کہنے سے انکار کر دیے۔
واضح رہے کہ کلکتہ ہائی کورٹ نے الیکشن کمیشن کو اسمبلی انتخابات کے آٹھویں اور آخری مرحلے کی ووٹنگ کے دوران کورونا گائیڈ لائن پر سختی سے عمل کرنے کو یقینی بنانے کی ہدایت دی تھی۔
کلکتہ ہائی کورٹ کے چیف جسٹس ٹی بی این رادھا کرشنن چھٹے مرحلے کی ووٹنگ کے بعد سے ہی الیکشن کمیشن کو کورونا گائیڈ لائن پر عمل درآمد کرانے کے لیے پھٹکار لگاتے رہے ہیں۔
