کولکاتا بین الاقوامی کتاب میلہ کا شمار دنیا کے معروف کتاب میلوں میں ہوتا ہے۔ گذشتہ چار دہائیوں سے کولکاتا بین الاقوامی کتاب میلہ کا انعقاد کیا جار ہا ہے، جس میں لاکھوں کی تعداد میں کتابوں کے شائقین جمع ہوتے ہیں۔
کورونا وبا کی وجہ سے گذشتہ دو برسوں سے کتاب میلہ کا انعقاد نہیں کیا گیا، لیکن کورونا وائرس کے پھیلاو میں نمایاں کمی واقع ہونے کی وجہ سے ریاستی حکومت نے آئندہ برس کتاب میلہ کا انعقاد کرنے کی اجازت دی ہے۔
کتاب میلہ کا افتتاح آئندہ 31 جنوری کو کیا جائے گا۔ کتاب میلہ 31 جنوری سے 13فروری تک جاری رہے گا۔ اس مرتبہ کتاب میلہ کا موضوع بنگلہ دیش رکھا گیا ہے۔ اس کے ساتھ ہی بنگا بندھو شیخ مجیب الرحمان کی یوم پیدائش کے موقع سے خصوصی پروگرام کیا جائے گا۔
اس کے علاوہ نیتا جی سبھاش چندر بوس کی یوم پیدائش اور ہندوستان کی آزادی کے 75 ویں سالگرہ کے امرت مہا اتسو کے پیش نظر خصوصی پروگرام بھی پیش کیا جائے گا۔
پبلشر اینڈ بک سیلر گلڈس کے صدر سکھیندو شیکھر رائے نے بتایا کہ میلے میں بین الاقوامی پبلشر کی آمد معمول کے مطابق ہوگی۔ اس کے علاوہ ملک بھر سے مختلف زبانوں کے پبلشر تشریف لائیں گے۔
اس کے ساتھ ہی کتاب میلہ کے دوران کووڈ پروٹوکال کا خاص خیال رکھا جائے گا۔ کتاب میلہ میں ان کو ہی جانے کی اجازت ہوگی جنہوں نے کووڈ ویکسین کے دونوں ڈوز لے چکے ہیں۔ بچوں اور 18 سال سے کم عمر کے لیے بعد میں جانکاری دی جائے گی۔
